Карпатске простопѣние — уникатна форма вокалной литургийной музикы на Карпатской Руси.Джумба Д., Магочи П. Р., сс.325–326.
Опис На роздѣл од богослужебной музикы, написаной про церковный хор, карпатске простопѣние спѣвають унисоно вшиткы парохиане под веджѣньом пѣвцоучителя, дяка, кантора. Мелодика и способ поданя простопѣния одличують карпатскых Русинох (заедно грекокатоликох и православных) од вшиткых иншых выходнославянскых народох. Унисоно спѣв зосилнять едноту громады, въедно з тым додаючи каждому чутя особного вдохновѣня.
История ХарактерностьКорѣнѣ карпатского простопѣния суть во византской литургичной музицѣ, основаной на системѣ восьми гласох. Католицка Церковь латинского обряду ку XIII. сторочу мала усталеный и занотованый свой литургичный спѣв (григорианскый), а во Византской Церкви ествовали розличны виды спѣву: давнорускый (знаменный), почайовскый, галичскый, сербскый, болгарскый и карпатскый (карпаторусинскый). Карпатске простопѣние мать сполочны характеристикы, типовы про славяно-византску традицию, але выокремлять ся тым, же гласы и новты в незмѣнных частях Божой службы были под вплывом мѣстных русинскых людовых мелодий, и в часѣ службы часто ся хосновали гармоничны средства, характерны про людову творбу. УнификацияЦерковный спѣв зачали учити в Мукачовской богословской школѣ в року 1774 и в Унгварской грекокатолицкой учительской семинарии, закладеной року 1794 епископом Бачинскым. Уже в тот час кантор Иван Югасевич-Склярскый склав сѣм рукописных книг церковной музикы. Од другой половкы XIX. стороча зачинають выходити печатны книгы церковных спѣвох, еднов з котрых быв Хлѣб души Александра Духновича, перевыдаваный 11 разы. В конци стороча епископ Юлий Фирцак поклав улогу унификации простопѣния Мукачовской грекокатолицкой епархии. Тоту улогу часточно выконав Иван Силвай, котрый склав Пѣсенникъ (1902), таксамо перевыдаваный даколько разы. Наконець, в року 1906, композитор, диригент и професор Унгварской грекокатолицкой учительской семинарии, Йоанн Бокшай склав цѣлоохопный зборник текстох и нот на основѣ спѣву кантора Унгварского катедралного собора Йосифа Малинича, под назвов Церковное простопѣніе. РосширѣняЗборник Бокшая-Малинича перевыдавав ся вецей разы и принятый за основу простопѣния в Мукачовской, Пряшовской, Гайдудорогской и Крижевской грекокатолицкых епархиях и вецерох емигрантскых епархиях в США и Канадѣ. В юну 2006 высокы представителе тых епархий зобрали ся в Ужгородѣ на меджинародну конференцию ку 100-рочу карпатского простопѣния и оддали честь памяти его творцям.
Жерела и одказы Джумба Д., Магочи П. Р.: Карпатське простопініє //Енциклопедія історії та культури карпатських русинів. Укладачі Маґочій П.Р., Поп І. — Ужгород: Вид-во В.Падяка, 2010. — 856 c.+ХХХІІ с.
Референции
Категория:Церковна музика Катеґорія:Грекокатолицка Церковь