Дѣло́ве, до 1946 Трѣбушаны — село в Раховском районѣ Закарпатской области Украины, положене на рѣцѣ Тиса, на обох берегах, о 17 км од районного центра и желѣзничной штации Рахово. Центер сельской рады, котрой подряджены тыж села Круглый и Хмельов.Тронько П., с. 526.
Сельска рада Ділівська сільська рада 90625, Закарпатська обл., Рахівський р-н, с.Ділове, вул.Трибушанська, 51 тел. 03132 3-23-21
Од року 2020 входить до Раховской громады.
История Перва документална упоминка о селѣ Tribusa «на юг од Рахова» походить з року 1600. Назва Tribusany зафиксована од року 1773. Село в конци XIX. стороча ся золляло з сосѣдным Бѣлым Потоком и одты походить мадярска назва Terebesfejérpatak, хоснована донынѣ. Топоним Трѣбуша славянского походжѣня, од *terbiti, trěbiti, што значить чистити, знищовати, ортовати, корѣнковати. Официална украинска назва Ділове, хоснована од року 1946 — адъектив од диалектного русинского дѣл, што означуе гору або вододѣлный гребѣнь.Sebestyén Zsolt, с. 142. Од XVIII. стороча в горѣ Довгоруня добывали желѣзну руду и з ней топили сыре желѣзо, од 1870-х рокох желѣзна гута заникла, а на ей мѣстѣ зачали фунговати скляна, на плоске и дуте скло, котру закрыли в року 1926, лишивши без роботы около 100 людей. В списованю з року 1930 в селѣ Trebušany зафиксованы 2326 обывателе, з них 1594 Русины, 245 Евреи, 172 Чехы и Словаци, 118 Мадяре, 4 Нѣмцѣ, 10 иншых народностей, 183 чужоземцѣ без чехословацкого горожанства. Вѣрникы: 1345 — грекокатолици, 449 — римокатолици, 145 — православны. Школы: русинска (5 клас), чешска (3 класы). Уряды: нотарскый, пошта, телеграф, телефон, жандарскый, финанцовой стражы (мытниця), земелный и лѣсовый. Промысел: скляна гута (до року 1925), од року 1930 выроба бочок, два фиресы, електрарня, вапняниковый камѣньолом з бѣлым мрамором. Транспорт: желѣзнична штация.Достал Я., сс. 164–165. Совѣтска доба зачала ся з приходом Червеной армады 16 октобра 1944. За тоту добу отворили середню школу, културный дом на 450 особ, библиотеку, амбуланту, породный дом, дѣточу захоронку, пекарню и дом служоб.
Вызнамны родаци Иван Рознѣйчук (1910–1945), познатый як Марко Бараболя, подкарпатскый сатирик.
Жерела и одказы Sebestyén Zsolt: Máramaros megye helységneveinek etimológiai szótára. Bessenyei könyvkiadó. Nyíregyháza, 2012. Достал, Ярослав. Підкарпатська Русь (Закарпаття періоду Чехословацької республіки: 1919–1938). Ужгород, «Карпати», 2014. Тронько П. и др. (ред.) Історія міст і сіл України. Том 7. Закарпатська область. К. 1969.
Референции
Категория:Населены пункты Украины Категория:Населены пункты Закарпатской области