Иван Панькевич, (; *6. октобер 1887, Цеперов, Галичина, Австро-Мадярщина – †25. фебруар 1958, Прага, ЧССР — чехословацкый (подкарпаторускый) украинскый лингвиста, литературознатель, фолклориста, етнограф, умѣлствознатель, историк, педагог и сполоченскый дѣятель, организатор школной справы Подкарпатской Руси (1919–1939).Иван ПопIvan Pop
Биография В роках 1907–1909 учив ся во Львовской универзитѣ, в року 1912 скончив Вѣденьску универзиту. Преподавав в роках 1912–1919 на Конзуларной академии (Вѣдень), в роках 1920–1939 — в гимназиях Ужгорода, з 1939 — професор Братиславской и Карловой универзиты (Прага). Еден зоз закладательох товаришств «Просвіта» і «Педагогічного товариства Підкарпатської Русі» в Ужгородѣ (1920), редактор «Наукового збірника товариства „Просвіта"» (1922–1928), журнала «Підкарпатська Русь» (1924–1936).Гриценко П. Ю.
По приходѣ «другых Мадярох» в марцу 1939 одышов раз до Братиславы, пак до Прагы, де став ся доцентом «Українського Вільного Університету» (1939–1945). В роках 1945–1952 преподавав украинскый язык и литературу на Карловой универзитѣ в Празѣ, сполупрацовав в украинизации Пряшовского края, зокрема написав приручку про учительох украинского языка во школах края («Короткі правила українського правопису для вжитку Пряшівщини», 1952), што была выдана анонимово. Але в часѣ кампании комунистичной влады ЧССР против «украинского буржуазного национализма» потерпѣв и Панькевич: быв пропущеный з роботы. Остаток живота перебыв в Празѣ, продовжуючи штудии русинскых диалектох.
Чинность в школствѣ Подкарпатской Руси В року 1920 пражска влада поклала Панкевича референтом школной управы Подкарпатской Руси (1920-1924). Прага му звѣрила написати учебникы про школы края «на руськом народном языку». Панькевич як участник украинского народного руху сповнѣня той улогы выхосновав, жебы завести украинскый язык до школ Подкарпатской Руси и украинизовати школство края, але чинив тото, на роздѣл од радикалных националистох, осторожно. Складены ним учебникы («Граматика руського языка», 1922, 1927) были написаны раз не на чистом украинском литературном языкови, а на языковой мѣшанцѣ, близкой ку русинской бесѣдѣ (так звана «панькевичівка»).
Основны принципы фонетично-етимологичной «панькевичівкы» были приняты в року 1920 на учительском зъѣздѣ Подкарпатской Руси и выкладены в граматицѣ «Граматика руського языка» (Мукачово, 1922). Они брали на увагу мѣстны традиции, зокрема, зостала графема Ѣ, решпектовали ся мѣстны фонологичны одликы (мы — ми, мыло — мило), а розличны рефлексы звука [о] в новозакрытом складѣ позначали ся графемов Ô (з так званым «дашком»). «Панькевичівка» проекзистовала до року 1945, а пак была вымѣнена на общеукраинскый правопис.
Наперек тому, же Панькевич быв остро критикованый украинскыма радикалами, тот гамишный поступ му ся удав, и уже в учебниках (поз. третье выданя его «Граматики», 1936) он сам «вычистив» из них так званы «мѣстны диалектизмы» и завершив переход к украинскому литературному языку.
Уважаючи на протесты, чехословацка влада выдала росказ на школный референдум, котрый одбыв ся в року 1937. Тот референдум указав, же за традичну етимологичну граматику были 73,3%, а за «панькевичівку» — 26,7%.
Наслѣдство про сучасну науку Панькевич до конця живота зберав картотеку южнокарпатской лексикы, котра наконец обсягла 116 тысяч карток, але зостала невыдана. В року 2023 Чешска академия наук опубликовала Панькевичову дигиталну лексичну базу, котра теперь доступна на интернетѣ задарь.Lexikální databáze jihokarpatských nářečí z materiálů I. PaňkevyčeUnikátní databáze jihokarpatských nářečí je dostupná on-line
Жерела и одказы
Референции
Катеґорія:Педаґоґы Катеґорія:Лингвисты