Ла́слов Бі́ров (; при рожденьови László József Schweiger; по латиноамериканськы записаный ги Ladislao José Biro; 29. септембра 1899, Будапешт – 24. октовбра 1985, Буенос-Айрес) быв мадярсько-арґентинськый вынаходник, журналіста. Запатентовав першый комерційно успішный модел кулькового пера. Технічно не быв вынаходником такого кулькового пера — тото перед 50 роками учинив Джон Лавд, айбо його варіант не быв успішный у продажови.
Біоґрафія Ласлов Біров ся родив у рокови 1899 у мадярсько-жидувськуй родинї у Будапештови за Австро-Мадярської імперії. Няньо му ся писав Мозеш Матяш Швайґер (Mózes Mátyás Schweiger), мамка — Янка (рожд. Улман). Пусля ошколы, Ласлов робив журналістов на Мадярах.
Вынайденя кулькового пера
Роблячи журналістов, Біров замітив, ож чорнило, хоснованоє у печати ґазеты, скоро сохло, тай позад того не мож го было розмастити по папірьови. Ун пробовав тото такой чорнило схосновати на писаня пером, айбо його ідея не фунґовала; чорнило не затікало на конець пера.
У 1931. рокови Біров презентовав першый свуй модел кулькового пера на Межинароднуй будапештськуй выставцї. Над ним Ласлов робив зо своим братом Дєрдьом, хеміком. Они ся доумили покласти на конець ручкы не перо, а піціцьку сферу, котра слободно обертавучи ся, наберала чорнило из картріджа, такой подавучи го на папірь. Ласлов Біров запатентовав сяке перо у 1938. рокови у Парижі.
У часі Другої світової войны, у рокови 1943 браты Біровы уєдно из їх цімбором тай будучым бізніс-партнером Хуаном Хорхе Мейне (тоже єврейського походжіня) утікли уд націстув у Арґентину. Туды їх закликав товдышньый президент крайины Авґустін Хусто — ун ся спознав из Біровом на вакаційох у Юґославії тай почудовав ся из чудної серсамы на писаня. 17. юнія 1943 они зареєстровали у США патент №2390636, тай заклали компанію „Biro Meyne Biro“. У Арґентині кулькове перо так ся и кличе, birome; сесе слово по суті ся чинит из складеных до вороха фамелий Біров тай Мейне.
У рокови 1945 Марсел Бік, голова компанії BIC, купив уд Біровув патент тай учинив кулькове перо своїм головным товаром. Удтовды BIC продали булш ги 100 міліардув кульковых пер у всьому світови.
Смерть тай дідузнина Ласлов Біров умер у арґентинському Буенос-Айресови, у рокови 1985.
У Арґентині День вынаходника ся празднує в уродины Бірова, 29. септембра.
У подакотрых краинах (Споєноє королювство, Ірландія, Австралія, Італія) кулькове перо дотеперь знавут пораз кликати „biro“. Хоть тото зареєстрованый товарный знак, ун подаґде став общым назывником, так ги є из словами „ксерокс“ авадь „памперс“.
29. септембра 2016 компанія Google дала у свуй єдноименный веб-глядач „Google-дудл“, респ. спеціалный сяточный малюнок, посяченый Ласлову Бірову.
Референції
Катеґорія:Персоналии 20. стороча Катеґорія:Мадярскы новинаре