Сан Марíно () є головне місто штату Сан Маріно і єдно з ёго девятёх кастелів. Має 4 118 обывателїв. Находить ся на западных схылах найвысшого пункту Сан Маріна, горы Монте Тітано. Пяте найменше головне місто подля чісла обывателїв.
Ґеоґрафія Місто Сан Маріно сусїдить з кастелами Аквавіва, Борґо Маджоре, Фіорентіно і Кєзануова і з італьсков комунов Сан Лео.
Місто Сан Маріно ся складать зо семох курацій: Ка Берлоне, Канепа, Казоле, Кастелларо, Монталбо, Мурата і Санта Мустіола.
Меджінародна академія наук Сан Маріно мала свою резіденцію в тім містї.
Історія Предпокладать ся, же місто было заложене святым Маріном і дакількома хрістіаньскыма утеченцями, котры втїкали перед римскым пронаслїдованём в роцї 301.
Сердце міста охраняли три вежы: перша, Ґуаіта, поставена в 11. столїтю, мала репутацію неприступной, што до великой міры стримовало од нападів.
Напятя зо сусїдныма силами выкликало потребу побудовати другу вежу, Честа (13. столїтя). Оборонна сістема была докончена аж по ставбі третёй вежы, Монтале (14. столїтя) – найменшой зо вшыткых, поставеной на послїднїм верьху Монте Тітано.
З ростом чісла обывателїв міста ся теріторія країны розшырила о дакілько квадратных кілометрів. Кедьже політіка Сан Маріна не была замірена на інвазії або войны з цїлём здобыти новы теріторії, Сан Маріно здобыло остатнїх вісем кастелів, котры творять країну, посередництвом накупів і договорів.
Політіка Місто є резіденціёв Санмаріньской хрістіаньско-демократічной партії, конзерватівной партії, котра є в сучасности єднов з головных владных партій.
Економіка Економіка міста Сан Маріно была всягды узко повязана з економіков країны. Аж донедавна были головныма господарьскыма чінностями той локації добываня каміня і каменарьство. Днесь є економіка розманїтїша і обсягує путёвый рух, бізніс, продай поштовых знамок і мале польногосподарьство, хоць тото послїднє є на упадку.
Шпорт Місто Сан Маріно має три фотбаловы команды: СС Мурата, СП Тре Пене і San Marino Academy. Містом проходила штафета з олімпійскым огнём через Сан Маріно в періодї перед зимныма олімпійскыма грами в роцї 2006.
Ґалерія
Референції
Катеґорія:Населены пункты подля алфавиту Катеґорія:Населены пункты Сан Маріна Катеґорія:Головны міста Катеґорія:Міста Сан Маріна