Убивство Ірины Фаріон ся стало 19. юлія 2024. року у 19:30 кийовського часу у Львові на улици Томаша Масарика. Фаріон была ранена у голову тай госпіталізована; у 23:30 она умерла у реанімації. Зачали криміналный процес тай за дакулко днув быв арештованый пудозрьованый.

Особа убитої Іри́на Фаріо́н () была украйинськов языкознательков, політичнов и общественов діячков, народнов депутатков Верьховної Рады Украйины VII. скликаня (2012–2014), членков Всеукрайинського здружіня „Свобода“ тай професорков катедры украйинського языка у Націоналнум університеті „Львівська політехніка“. Фаріон была контроверзнов особов в украйинському політичному дискурсі позад свойої катеґоричної позиції против російського языка тай російськоязычных украйинцюв, у тум числі против російськоязычных катун Збройных сил Украйины; єї условльованя дуставали шырокый резонанс у ЗМІ тай неєднозначну реакцію украйинського населеня.

Перед убивством Перед трьома годинами до убивства Фаріон опубліковала послідньый пост у соціалных сітках из анонсом нового епізода „Ґена украйинцюв“ — свойої проґрамы на львувському телеканалови „НТА“ — котрый мав уйти у слідувучый понеділок. Подля слув цімбора родины, перед фаталным пораненьом она по телефонови розказала доньці за завершеня накручованя відеа на свуй YouTube-канал тай планы зайти на вечерю до неї з онуками и переночовати у них. На слідувучый день Фаріон плановала рушити з файтов у Болгарію на спочивок на два тыжні.

Убивство 19. юлія 2024 у 19:30 за кийовськым часом Ірину Фаріон ранили у потылицю из огнестрілної зброї коло хыжі №3 на улици Томаша Масарика у Львові, де она жыла. Там убита из куфром у руках чекала таксій. Подля слув свідкув, она уйшла из будовы, а пак ид нюй пудбігнув челядник у рукавицях тай из піштольом, єден раз стрілив у голову тай утікнув. Піштоль быв без глушника. У 20:00 Фаріон забрали медичні робутникы у болницю Сятого Пантелеймона Першої медичної спулкы Львова. У сесь час вісті за подію ся зачали шырити соціалными сітками. По госпіталізації была у критичнум стані, глубокуй мозґовуй комі тай на штучнуй вентилації легкых. Фаріон умерла у туй болници у 23:20, так ся и не очнувши.

Розслідованя Слідство зглядує дві верзії мотива: „общественна, політична діялность“ тай „лична неприязнь“. Ствержувут, ож убивця вадь його соучасник булше тыжне слідив за хыжов, де жыла Фаріон тай файно сплановав атаку. Подля слув міністра уднушньых діл Украйины Ігоря Клименка, на місті вбивства найшли ґілзу тай установили калібер зброї — 9 мм. Айбо зброю, из котрої забили Ірину Фаріон, не найшли.

21. юлія правоохоронні орґаны опубліковали вонковый вид челядника, котрый годен быв быти скапчаный из убивством, тай голосили за гляданя. Того такой дне поліція найшла хыжу дачного филя у хащовуй місности урочища Голоско у Шевченкувському районі Львова, де подля верзії слідства муг ся прятати убивця. У нюм найшли потенційні речі нападника, у тому числі пластикову посуду, матрац, заголовкы, попельницю из бычками тай другі предметы. Подля слув свідкув, убивця слідив кажджый день уд 11. юлія, сидячи пиля сосіднього пудїзда тай лишавучи тото місто лиш на пару годин у обід. Пораз носив ташку, у котруй, за гадков поліції, была зброя.

24. юлія удповідалность за убивство узяла на ся російська неонацістська ґрупа („National-Socialism / White Power“), члены котрого, подля свойих слув, убили Фаріон ги „шкодницю тай расову придайцю“, прикапчавши д заяві 10-секундноє відео гибы з моментом самого убивства. Подля слув Клименка, тонель тай мотор у відеови збігавут ся з тыми, котрі были у дворі убитої. Там такой быв укладеный маніфест, автор котрого мотивовав убивство тым, ож Фаріон розпальовала ненависть за языковым признаком удну украйинського общества.

Слідство припустило, ож стріляло ся из переробленого стартового піштоля. „Такі патроны надходили в Украйину в 2017–2018. роках, уцілови коло 1 міліона штук. Се специфічна куля, небойова. Теперь маєме установити, де кулю купили; може, на чорнум рынку,“ — заявив Ігорь Клименко.

Пудозрьованый 25. юлія у вароши Дніпро быв задержаный 18-ручный пудозрьованый Вячеслав Зінченко. Бігом розслідованя провірили маршрут удходу вбивці тай обникали 100 гектарув хащі. Його особу установили вдяку фотоґрафіям тай подобенкам из камер. Ун орендовав маймало три квартілі у Львові, ладячи ся д злочинови. Його задержали, слідство держало го за сповнителя злочина. На єднум из відий мож было замітити пудозрьованого за пув минуты до устріла. На другу камеру трафив момент його перевдіваня. Поєдні предметы: цуря, панаму, околарії, ташку и так дале — подля слідства „діля маскованя“ пудозрьованый загнав у Львув из Дніпра „Новов поштов“. Криміналный психолоґ заявив, ож леґіньом „кось професійно керовав“.

Вячеслав Зінченко ся родив 3. апріля у році 2006. У 2023. рокови кунчив Дніпровську ґімназію №62 тай вступив у Дніпровськый університет уднушньых діл на заочноє школованя. Бавив фотбал у команді МДЮСШ U-19. При задержаньови у його телефоні найшли были незагнату прощалну записку старшині, два шорикы котрої правоохоронці опубліковали. Отець задержаного, фронтовик, заявив, ож його сын не мав мотивув про вбивство Фаріонкы, є патріот тай „не мав украйинофобські назоры“. Матірь, котра робит у ошколі у Дніпрі, у коментарьови заявила, ож Зінченко не муг стріляти, бо не мав ани мотивув, ани скушености. Она вповіла, ож челядник на фотоґрафійох не похожый на єї сына, котрый муг быти хыба соучасником. Кромі того вна розказала, ож не замітила нич пудозрілого у справованю сына тай не спознала на фотьці віроятного убивцю у панамці. Щи додала, ож сын хотів стати катунов, у марцьови пруйшов курсы на оператора безпілотного літалного апарата.

Подля інформації ЗМІ, Зінченко у Telegram гибы „критиковав жыдув у чолови Украйины тай заявляв, ож украйинські праві кываня („Азов“ тай „Правый сектор“) боювут за інтересы жыдув у обмін на заохоченя уд них“ и так дале.

У залі суда, кой му убирали запобіжні міры, пудозрьованый не признав свої вины, а звіданя журналістув за убивство назвав „нудятинов“.

У новембрі Галицькый суд Львова лишив пудозрьованого пуд вартов на 60 днув (до 12. януара 2025) без права внесеня заставы. У децемброви дії пудозрьованого были перекваліфіковані за статями: пп. 8, 14 ч. 2 ст. 115 Криміналного кодекса Украйины — „нарочноє убивство, скапчаноє из исповненьом общественного обязка тай из мотивув націоналної нетерпимости“; ч. 1 ст. 263 КК Украйины — „незаконноє володіня огнестрілнов збройов“. Слідство дустало інформацію из Google-акаунта Зінченка, удкідь ся узнало за його глядацькі запросы, „великоє число навщив на форумах за зброю тай пудпискы у месенджерови на дві ксенофобські ґрупы, у тум числі скапчану из російськов неонацістськов орґанізаційов“.

У історії бравзера правоохоронці найшли удкликованя на гляданя стартового піштоля, котрый ун глядав ищи з середины мая. Слідство зглядовало, де пудозрьованый муг ся научити стріляти. Бігом обгляданя 14. авґуста найшли піштоль ФОРТ 12-Р, маґазин, патроны тай ищи шор речовых доказув.

3. януара 2025 Шевченкувськый суд Львова продовжив Зінченкови запобіжну міру у формі держаня пуд вартов без заставы на 60 днув, до 4. марця 2025.

26. фебруара 2025. рока Зінченкови продовжили арешт без заставы на 60 днув, до 24. апріля.

Опровуд Опровуд Ірины Фаріон удправили 22. юлія 2024. Попрощати ся з нив прийшли дакулко тысяч люди коло Ґарнізонного храма сятых апостолув Петра и Павла у Львові, де ї провожали у послідньый путь. Поховали ї на львувському Личакувському теметові, недалеко уд гроба украйинського гудака Володимира Івасюка.

Дідузнина 23. юлія на пленарнуй нараді Львувської варошської рады депутаты предложили перейменовати єдну из улиць на честь Ірины Фаріон у рамках „деколонізації“ у Львові, Брюховичах авадь Винниках.

2. авґуста 2024 Ивано-Франкувська варошська рада прияла рішеня перейменовати улицю Гвардійську на улицю Ірины Фаріон у Ивано-Франковську тай затвердили проґраму украйинізації памняти Ірины Фаріон у Ивано-Франковськуй громаді.

Референції