Євге́н Євге́нович Жу́пан (30. децембра 1950; офіційно 1. януара 1951, Ракошино, Мукачовськый район) є русинськый діточый дохтор-анестезіолоґ, Заслуженый дохтор Украины, завідовач удділеня анестезіолоґії тай інтенсивної терапії Закарпатської діточої болниці, ексдепутат Мукачовської варошської рады (1990–1994) тай Закарпатської обласної рады (1994–2019), голова Народної рады русинув Закарпатя, репрезентант русинув у Федералнуй раді европськых націоналности ( авадь накурто FUEN), общественный активіста. Єден из орґанізаторув фестивала „Червена ружа“.
Животопис Євген Жупан ся родив 30. децембра 1950. рока у селови Ракошино Мукачовського района, в учительскуй родинї. Позад рішеня отця записали у документы датов рожденя 1. януара 1951.
У 1967. рокови кунчив школу из золотов медайлов.
Штудовав на медичному факултеті Ужгородського націоналного університета, з котрого у рокови 1973 матуровав. Такой по завершеньови університета 4 рокы проробив хірурґом-анестезіолоґом у Дубровици Рівненської области, де мав дві палаты інтенсивної терапії. Робив у Закарпатськуй областнуй діточуй болници у Мукачові, де до 2014. рока керовав удділеньом анестезіолоґії тай інтенсивної терапії, а пак быв покладеный головным дохтором.
Активізм Активізмом яв ся занимати перед розпадом Совєтського союза. По закладеньови ужгородського Общества карпатськых русинув у році 1989 дустав уд Стефана Поповича предложеня вчинити аналоґ у Мукачові, ставши його помучником.
На установчуй конференції Закарпатського областного културно-просвітительського общества им. Александра Духновича 12. апріля 1994 у Мукачові быв у президії, пудпоровав Михаила Алмашія.
У 2005. рокови заклав Народну раду русинув Закарпатя из цільов искапчати пудкарпатські русинські орґанізації у єдно кываня у діалоґови з Украинов без страты нима незалежности. Быв убраный головов нововытвореного рокаша.
Из 1997. року репрезентує русинув, котрі жиют на території Украины, у Федералнуй раді европськых націоналности.
Політична карєра Быв депутатом Мукачовської варошської рады у 1990–1994. роках, а уд 1994. по 2019. рук пробыв депутатом Закарпатської областної рады пять скликань за шором.
За час свого депутатства пуднимав звіданкы медицины тай вопросы русинської културы. Вдяку сьому єден том пятитомного „Словаря русинського языка“ Юрія Чорія быв уданый за державні гроші тай из бюджета ся часточно фінансовав фестивал „Червена ружа“.
Позад предложеня Євгена Жупана 7. марця 2007 на сесії Закарпатської областної рады было приятоє рішеня признати націоналность „русин“ тай занести ї у испис націоналности Закарпатської области. „За“ проголосовав 71 депутат, 2 — „против“ тай 2 — „удержали ся“.
22. децембра 2009 из його ініціативы голосовало ся за „Вручаніе“ („Подкарпатскіе русины, оставте глубокій сонъ…“) Александра Духновича ги за гімн Закарпатської области, айбо рішеня не пруйшло позад єдного удкликаного голоса.
4. новембра 2011 на сесії Закарпатської областної рады Євген Жупан передав зверненя „Всезакарпатського зїзда русинув“ из просьбов удкрыти кафедру русинського языка тай літературы в Ужгородському націоналному університетови.
Фестивал „Червена ружа“ Фестивал „Червена ружа“ ся проводит зачинавучи уд рока 1998. На фестивалови выступавут як містні колективы, так и загатарні. Ворохом была проведена 21 „Червена ружа“ — из них єден раз из назывков „Горы дорожі уд злата“. Єден рук быв пропущеный позад пандемії COVID-19; по повномасштабнуй інвазії Росії фестивал ся не проводив.
Личный живот Отець му быв русинськым учительом при Чехословакії тай Другуй Мадярськуй республіці у Вилокови (1920. рокы), у Кострині (у 1933), пак го мадяры поклали робити у Ракошині (у 1941). Сам Євген Жупан розказовав, ож отець сидів у Думені.
Одказы
Інтервю: Євген Жупан за карпаторусинськоє двиганя на Пудкарпатю, фестиваль «Червена ружа» и перспективы културного розвоя. Журнал „Отцюзнина“
Референції