Telegram вадь Telegram Messenger („Телеґрам“) є многоплатформовый „хмарный“ сервіс, соціална сітка и месенджер, запущеный на iOS 14. авґуста 2013 и на Android 20. октовбра 2013. Предлагає публічні ґрупові чаты тай каналы, обмін файлами, жыві транслації, кунцьово зашифровані голосові и відеозвонкы тай опціонално кунцьово зашифровані личні чаты.
Telegram закладеный у 2013. році Павлом и Ніколайом Дуровыми. Його серверы розміщені у разных ґеоґрафічных локаціях, а штабквартира є у Дубаї, Споєных Арабськых Еміратах.
Історія Telegram быв закладеный у 2013. році братами Павлом и Ніколайом Дуровыми, котрі сперед тым розробили російську соціалну сітку VKontakte. У 2014. році они лишили VKontakte, заявивши, ож єї забрав російськый уряд. Павел продав быв свою частку в компанії тай пушов гет из Росії по провбах опирати ся властям. Ніколай розробив протокол MTProto, котрый став основов Telegram, а Павел му дав фінанчну пудпору через свуй фонд Digital Fortress.
Компанія Telegram зареєстрована на Британськых Вірджінськых островах тай ги LLC (дружество из ограниченов удповідалностьов) у Дубаї.Telegram FZ LLC – Dun & Bradstreet Она не публікує інформацію за вто, де ся орендувут офісы вадь через котрі юридичні особы ся оформлює оренда, указувучи на потребу „защищати команду уд нежеланого влива“, а хосновачув уд урядовых тискув. По выходу з Росії Павла Дурова у 2014. році ун заявляв, ож ся возит из державы в державу из малов командов проґраміштув, котра ся чинила из 15 основных членув.
Єден ексробутник VK заявив, ож Telegram мав робутникув у Санкт-Пітєрбурзі; Павел Дуров казав, ож команда Telegram у 2014 розмістила штабквартиру в Берліні, Німещина, айбо не дустала посвідкы на бываня про вшыткых членув команды и поміняла юрисдикцію на зачаткови 2015. Уд 2017. року компанія ся базує у Дубаї. Датацентры розміщені по разных юрисдикціях, обы уменшити різікы тиска з боку урядовых інституцій. Компанія арґументує тото потребов „защищати податкы, котрі не покрывавут ся кунцьовым шифрованьом“.
Критика тай контроверзії Telegram ся пуддавав авадь пуддає критиці позад шора причин:
протирічачых заяв за монетизацію тай спувробутництво из державными урядами; удсутство вадь низку прозорость у обробці запросув из боку державных орґанув; нарушеня авторськых прав хосновачами; подачу представителям Европської унії неправдивої статистикы за число хосновачув (про реґулацію подля місных законув за цифрові сервісы); хоснованя месенджера про продаж и купованя заказаных субстанцій; терористичну діялность; шыріня незаконної порноґрафії, у тум числі діточої; шыріня приватної інформації людий без їх согласу; и другі незаконні цілі. Telegram має дакулько ресурсув про модерацію и прозорость модерації, наприклад офіційні каналы, де ся публікує статистика за заблоковані акаунты, чаты, каналы, хосновані про нелеґалну діялность; тай методы на скаргы на нелеґалный обсяг.
З боку украйинськых властий и публікы Telegram пораз ся обвиняє у спувробутництві из російськыми спецслужбами.
Референції Катеґорія:Windows