Майк Герінґтон (рож. 1964) є америцькый проґраміст и бізнесмен. У рокаши з Ґейбом Нюелом є єдным из закладнику відеобавкової компанії Valve. По успіха первого продукта Valve, Half-Life (1998), Герінґтон удышов из компанії в годови 2000. У 2006. годови ун заклав сервіс на фотоедітованя з назвов Picnik. Карєра Герінґтон быв проґрамістом у компанії Dynamix, што розробльовала відеобавкы, и робив гий дізайнірь на операчнуй сістемі Windows NT у Microsoft. У 1996. годови ун в рокаши з Ґейбом Нюелом тай другыми бывшыми робутниками Microsoft, заклали Valve. Герінґтон продав свої акції Microsoft, убы профінансовати свою половину стартапа. Його жона в тому часови, Моніка Герінґтон, была стратеґічным маркетолоґом Valve у пирьвых годах.
Герінґтон и Нюел фінансовали розробку пирьвої бавкы Valve – Half-Life (1998), проґрамовати котру помагав і сам Герінґтон. Тота бавка мала великый успіх – гий у рецинзіях, так и в продажах. Герінґтон повів, же: «У Microsoft чоловік все думав: „Ци є муй успіх направду муй, ци то Microsoft?“ Айбо з Half-Life я знав, же із Ґейбом мы тот продукт и тоту компанію заклали з нулы».
15. януваря 2000. года Герінґтон продав свою частку Valve Ґейбови Нюелови й удышов, убы провести булше часу з жонов. По словах Нюела, Герінґтон уже не хотів різіковати другым проєктом по великому успіхови Half-Life.
У 2006 годови Герінґтон в рокаши з цімбором и бывшым колеґом Даріном Масенов заклали сервіс на едітованя фоток Picnik, котрый в марцьови 2010 года купив Google. Герінґтон уволив ся з Google у марцьови 2011. У янувари 2012 ун ще раз из Масенов заклав компанію Catnip Labs. У 2016–2018. годах Герінґтон быв технічным діректором у Committee for Children, а уд новимбря 2018 до марця 2020 – технічный діректор у компанії Amplion.
Удкликаня
Катеґорія:Жыючі люде Катеґорія:Уродили ся 1964 Катеґорія:Люди котрі робили в Microsoft