Pfeilstorch (з „стріла“ тай „ґовляк“; ~ пфайлшто'х; мн. число Pfeilstörche, ~ пфайлшты'хе) є білый ґовляк, пробитый стрілов авадь копійов бігом його зимованя у Африці, котрый ся вертат у Европу из тым такой проєктілом у свойому тілі. На 2003. рук у Німещині были задокументовані 25 Pfeilstörche.
Першый и майзнамый Pfeilstorch быв білым ґовляком, найденый у 1822. році коло німецького села Кліц у федеративному штаті Мекленбурґ-Передня Померанія. У його шиї была 75-центімийтрова копія из централної Африкы. Його затаксідермовали тай на днешньый день ун є у зоолоґічнуй колекції Ростокської універзіты. Зато го кличут Rostocker (Ростокськый) Pfeilstorch.
Pfeilstorch быв критичным про розуміня міґрації европськых потят. Перед тым челядь не могла обяснити наглоє кажджоручноє пропаданя білых ґовлякув авадь ластівок дымниць. Теорії того часу держали, ож они ся перечиньовали на другі филі потят, ставали мышами вадь усю зиму спали пуд водов, и такі теорії пропаґовали даже товдышні зоолоґы. Ростокськый Pfeilstorch доказав, ож потята міґрувут на великі дистанції у теплі краї.
Ернст Шіз задокументовав шор потят, у котрых застряли стрілы: африканськый білочеревый ґовляк, найденый у Танґаньїці, крачун на Мадярох, осоїд у Фінландії и чорный коршун. Окрем того, ун зафіксовав лебідюв тай пірястых качок из інуітськыма стрілами. У 1969 ун замітив, ож потята, пробитых стрілами, стали май рідкым феноменом позад того, ож лукы тай стрілы ся замінили огнестрілнов збройов.
Референції
Далшоє читаня
Катеґорія:Зоолоґія