Тоале́т, тоале́та ци зáход тото санітарна направа, котра збират людські удходы (мочу и фекалії), пораз и засобы гіґієны ги тоалетный папірь, як праило про їх збытя. Тоалеты из змывом (унітазы) хоснувут воду, а „сухі“ — нєт. Дизайны тоалетув ся рузнят: у Европі тай Сівернуй Америці популарні дизайны, призначені про сидіня; у Азії — такі, на котрых ся присідат; и доступні, из розрахунком на удобный доступ про людий из інвалідностями. У варошах ся тоалеты из змывом часто пудкапчувут до каналізаційных систем, а в май ізолованых місностях до септикув. Сухі тоалеты ся капчавут на ямы, зйомні контейнеры, компостні камеры и другі варіанты держаня и обробкы удходув, а подакотрі конструкції мавут механізмы удділеня мочі. Тоалет годен быти покладеный удну хыжі, што є популарно з многоквартільными будовами, айбо в подкотрых приватных хыжах (особено у сільськуй місности) знає стояти як правило сухый тоалет на улици в окремуй будьці — бударьови.

Слова „тоалет“ и „заход“ ся часто хоснувут ай на саму комнату, де сут тоалет авадь тоалеты и другі санітарні направы, наприклад умывалникы на рукы, особено при розділеньови ванної комнаты з направами про вмываня тай „санузла“ (санітарного узла) з тоалетом.

На сучасні тоалеты ся хоснувут ушылиякі технолоґії; майчасто ся тоалеты чинят из керамікы (порцеланы), бетона, пластика вадь дерева. Май нові тоалеты мавут двойный змыв, малый змыв, пудогрів сідала, самоочищеня. Японія знама за просунуті тоалетні технолоґії. У тоалетах у цуґах ся часто хоснувут вакуумні змывы, котрі келтувут менше воды. При дочасных зборах вон авадь ставбі ся кладут портативні хемічні тоалеты. На гіґієну по дефекації ся часто хоснувут тоалетный папірь авадь біде.

Історично, даже на майранньых стадіях людськых поселень санітарія была важнов проблемов. Попри вто, многі бідні люди у розвивавучых ся крайинах маву доступ лиш до дуже базовых и чисто негіґієнічных тоалетув — а 419 міліонув людий домак не мавут доступа ид тоалетам и мусят удкрыто справляти потребу вонка. Такі проблемы приводят у тому числі ид пошыреньови зараз, передаваных фекално-оралным путьом авадь водов, ги холера и дізентерія. Завто ціль №6 у рамках проґрамы Стуйкого розвою Орґанізації споєных націй тото „забезпечити вшыткых людий доступом ид адекватнуй санітарії и гіґієні тай покласти конець удкрытуй дефекації“.

Обща інформація По світу ся хоснує повно всякых филюв тоалетув, айбо мож їх поґруповати так: из водов (помагат блоковати запах) вадь без (булшинов тото змывні тоалеты против сухых); призначені про хоснованя у сидячуй позиції вадь присіді; розміщені удну хыж авадь вонка (бударі); приватні вадь громадські. Сидячі тоалеты ся часто кличут тоалетами „западного филя“Gershenson, Olga; Penner, Barbara (2009): Ladies and gents – Public toilets and gender. Temple University Press, Philadelphia, Pennsylvania. и сут май удобні про людий из інвалідностями и старшых людий.

У разных крайинах сут популарні разны филі тоалетув. У розвивавучых ся крайинах доступ ид тоалетам закапчаный на соціоекономічный статус. Бідні люди у крайинах из низкыми доходками часто не мавут доступа ид тоалетам и давут ся до удкрытої дефекації вонка. Межинародні орґанізації ги СООЗ давут громадську увагу на йсю кризу через ушылиякі ініціативы, в тому числі Світовый день тоалета.

Громадськоє здоровля

На днешньый день 1 міліард людий у розвивавучых ся крайинах не мавут тоалетув дома и вмісто того ся давут до удкрытої дефекації. Єднов из цілий Стуйкого розвою — цільов №6 — є забезпечити цілоє населеня Землі санітарійов (а значит тоалетами) до 2030. року.

Тоалеты вто важный елемент санітарної системы, айбо треба и другі елементы: транспортацію, обробку, збытя вадь повторноє хоснованя удходув. Хворотам, у тум числі холера, котрыма хворівут дас 3 міліоны кажджый рук, мож запобігати ефективнов санітаційов и обробков воды, обы фекалії не заражали системы подачі воды, пудземні воды тай запасы питної воды.

Скапчані статі Змывный тоалет Громадськый тоалет Бударь Біде

Запяткы

Референції