San Donà (o San Donà de Piave) l'è un comun de pi o manco 40 000 àneme inte la provinçia de Veneçia.
Istoria La çità la se trova intel bas corso de la fiume Piave, a 45 km da Veneçia, la xe na çità moderna parchè la xe stà ricostruida dopo che la xe stada distruta inte la Prima Guera Mondiale, co la se troveva sul fronte tra Italiani e Austrìaghi (le bataje de la Piave e del Sostiçio), e i bonbardamenti de la Segonda Guera Mondiale. El paese l'è nat inte l'Età de Mezo (l'orìsene del nome el vien da la ceseta de San Donà, che parò la xe restada da la parte de Musil), inte na posiçion stratèzega tra la Marca de Treviso e 'l Dogado che 'l dependeva dereto da Veneçia. Fin l'Otoçento la jera na zona paludosa e malàrega, ma poch pi vanti, col Noveçento, l'è nat el Consorçio de Bonìfega de la Bassa Piave, che 'l jera un vanto par tuta l'Italia (la Bassa Piave la jera ciamada "la pìciola Olanda d'Italia").
Al di de ancùo San Donà la se cata inte na zona nevràlzega tra 'l Vèneto Oriental e el Friul, vesin de le àree de crèssita de la Marca e le parti turìsteghe del mar de Jèsolo (Cavaçucherina), Càorle e Eraclea (Grisolera); ultemamente la se ga candidà cofà capoluogo de la nova provinçia de la Veneçia Orientale, che la dovarìa nasser stacandose da Veneçia, condividendo el rolo insieme a Portogruaro (Porto). Le atività comerçiali e quele produtive le xe drio sviluparse inte na maniera cussì granda che tanta zente la xe drio vegner a viver qua, soradetuto da la zona çentral de la provinçia de Veneçia (visto che la çità la xe còmoda par viverghe e far el pendolar co Mestre, Veneçia, Pàdova e Treviso), tanto che la çità l'ha un tasso de crèssita tra i pi alti de tut el Vèneto (squasi mile àneme l'an).
El dialeto sandonadese El dialeto vèneto de San Donà l'è particolare par via de la posiçion de la çità, che la se trova equidistante da la laguna de Veneçia, el mar, la çità de Treviso (San Donà la xe dentro la so diòcesi) e el fato che la se trova longo la Piave (l'ha de le caraterìsteghe de la lengua che se trova longo tut el canal de la Piave). El sostrato de la lengua l'è Vèneto Trevisan, parchè i primi abitanti de la çità i vegneva da la Marca, parò le ghe xe tante influençe dal Veneçian: na caraterìstega del dialet de San Donà la xe de cavar via da la fin de le parole (squasi senpre) le vogali, e questa la xe na caraterìstega che la se retrova longo tuta l'asta de la Piave, da Belun zo fin Feltre, Conejan... N'altra caraterìstega inportante la xe el doparar [t͡s] par "Ç", che la se dòpara solche qua e inte la provinçia de Rovigo, e la xe caraterìstega de le zone agrìcole del Vèneto; ogni tanto i sandonadesi i xe tolti in ziro par sto motivo qua, ma tanti ghe ne fa na question de orgojo. Na curiosità: le esiste de le locuçion (lanpideva, tonideva...) che se dise solche a San Donà e anca intei dialeti vèneti de l'Istria (a Piran e Rovigno), l'è de le parole che le deriva deretamente dal venètego e che l'è restae inte la parlada odierna. In pi i sandonadesi i ga el fenòmeno de l'"L mole".
Evoluçion demogràfega
Altri projeti
Linganbi foresti
Categoria:Comuni de ła sità metropułitana de Venèsia