Verónica Forqué Vázquez-Vigo, conoixida artisticament como Verónica Forqué, naixida de Madrit l'1 d'aviento de 1955 y muerta en ixa mesma capital o 13 d'aviento de 2021, yera una actriz espanyola, activa en o cine espanyol y lo teatro dende primerías d'os anyos 1970 dica la suya muerte en 2021 y con cuantos premios recibius mientres a suya carrera cinematografica, entre los que cal destacar cuatre premios Goya. Yera filla d'o director y productor José María Forqué y d'a escritora Carmen Vázquez-Vigo, estando casada dende 1981 con o tamién director Manuel Iborra.
D'entre la suya filmografía, se puet destacar a suya participación en bellas cintas como ¿Qué he hecho yo para merecer esto? (1984, Pedro Almodóvar), Sé infiel y no mires con quién (1985, Fernando Trueba), La vida alegre (1987, Fernando Colomo), Moros y cristianos (1987, Luis García Berlanga), Bajarse al moro (1989, Fernando Colomo), Salsa rosa (1992, Manuel Gómez Pereira), Kika (1993, Pedro Almodóvar), ¿Por qué lo llaman amor cuando quieren decir sexo? (1993, Manuel Gómez Pereira), ¿De qué se ríen las mujeres? (1997, Joaquín Oristrell), u Clara y Elena (2001, Manuel Iborra). Tamién ha treballato en o mundo d'o teatro y en cuantas series de televisión, destacando-ie Platos rotos, Eva y Adán, agencia matrimonial u Pepa y Pepe.
Premios En 1987, mientres a 1era edición d'os Premios Goya, Verónica Forqué ganó lo Premio Goya a la Millor Actriz Segundaria por a suya interpretación en a cinta El año de las luces, dirichida por Fernando Trueba.
En 1988, en a 2nda edición d'os Goya, ganó lo Goya en dos categorías d'os premios, lo Premio Goya a la Millor Actriz (por a suya interpretación d'"Ana Chamorro" en a cinta La vida alegre, dirichida por Fernando Colomo) y lo Premio Goya a la Millor Actriz Segundaria (por o suyo papel de "Monique" en Moros y cristianos, dirichida por Luis García Berlanga).
En 1990, en a 4ena edición d'os Goya, fue nominada a lo Premio Goya a la Millor Actriz por a suya interpretación de "Chusa" en a cinta Bajarse al moro, dirichida por Fernando Colomo.
Finalment, en 1995, en a 8ena edición d'os Goya, tornó a ganar o Premio Goya a la Millor Actriz por o suyo papel de "Kika" en a cinta Kika, de Pedro Almodóvar.
Se veiga tamién Cintas interpretadas por Verónica Forqué.
Vinclos externos
Verónica Forqué en Internet Movie Database.
Categoría:Actrices d'a Comunidat de Madrit Categoría:Muertos en Madrit Categoría:Naixius de Madrit Categoría:Nominadas a lo Premio Goya a la Millor Actriz Categoría:Premio Goya a la Millor Actriz Categoría:Premio Goya a la Millor Actriz Segundaria Categoría:1955 (naixencias) Categoría:2021 (muertes)