L'aragonés centro-oriental ye l'aragonés que se charra entre a Val de Broto y a Val de Bielsa y entre Cotefablo y a Cinca. Presenta as caracteristicas foneticas de l'aragonés central y lexico común con l'aragonés oriental. Conserva bien elementos morfolochicos y sintacticos desapareixitos de l'aragonés occidental y centro-occidental.
Fonetica A -e final se conserva en casos que l'aragonés cheneral la perdió por apocope dende fa muitos sieglos (ya no yera present en a scripta medieval y no ye present en os residuos lexicos y toponimos aragoneses d'o castellano d'Aragón): Valle ("val"), puande ("puent"), fuande ("fuent").
L'aragonés d'a cuenca alta d'a Cinca (Valle de Puértolas, Valle de Tella y Val de Bielsa), pierde por apocope a -o final en mas casos que l'aragonés cheneral, fenomeno que observamos tamién en chistabín en continuidat cheografica. Este fenomeno se troba mas a sobén dezaga de -n- y -l-, pero se troba tamién dezaga de -y-: cul, goi, truc, truen, chiner, ferrer, etcetera
D'acuerdo con l'aragonés central presenta una menor resistencia a la sonorización d'as oclusivas xordas intervocalicas latinas que l'aragonés cheneral, conservando-se a xorda localment en palabras como capeza u vita, encara que no en atras palabras como presiego, que presentan a xorda conservata en aragonés meridional. A conservación afecta a lo participio, que ye en -ato, -ito reblando debant d'as formas chenerals en -au, -iu.
En a evolución d'o grupo latino -CT- trobamos con cierta frecuencia formas en -t-, que corresponden a -it- en aragonés cheneral: feto, muto, etcetera.., que pueden coexistir con a forma cheneral feito y con formas castellanizatas como fecho.
O bergotés, l'aragonés d'a Valle de Vio y d'A Solana presentan mayor tendencia que atras variants d'aragonés a la sonorización dezaga liquida, coincidindo con o tensín, que ye centro-occidental: Grupo -MP- > -mb-: Cambo en Torla, Oto, Broto, Buesa, Fanlo, Buisán, Yosa. Tramba en Torla. Embolla: ampolla. Grupo -NT- > -nd-: Candal, sendir, fuande, puande, undar, nomás que en Vió; planda y punda en Vio y Panticosa. Grupo -NK- > -ng-: Blango, bango, chungo, barrango, palanga. Grupo -LT- > -ld-: Aldo, buldorín, saldo, suarde, sangardana Grupo -RT- > -rd-: Xordica (y a variant chordica, con cheada). Grupo -RK- > -rg-: Forgancha.
A evolución d'a -X-, -SK- y -PS- latina ye en -ix-, como en aragonés oriental, a diferencia de l'aragonés occidental y centro-occidental.
Morfolochía As primeras personas d'os pasatos imperfectos d'indicativo acaban en -abe, -ebe, -ibe, coincidindo con o chistabín: puyabe, metebe, ubribe.
Cualques variants conservan una conchugación incoativa pa cualques verbos d'a tercera conchugación u conchugación en -ir.
O pasato imperfecto de subchuntivo no presenta vocal final en a primera persona singular y a tercera persona singular, acabando en -ás, -és, -ís en cuenta de -ase, -ese, -ise de l'aragonés centro-occidental y occidental y coincidindo con o que se troba en cualques textos medievals. yo aduyás, yo debés, yo partís.
Bi ha una millor conservación d'os participios fuertes que en atras variants d'aragonés.
Indefinitos belaún, belauna con variants, que se fan servir dende o tensín dica o benasqués.
Uso d'os adverbios guaire, nunca, cosa con sentito positivo en oracions interrogativas y condicionals. Se documenta en belsetán y aragonés d'a Val de Tella a l'igual que en benasqués.
Sintaxi L'aragonés d'a valle de Vio, l'aragonés d'a valle de Tella y o belsetán mantienen u manteneban dica fa poco encara o emplego d'o verbo ser como verbo auxiliar en cualques verbos intransitivos, encara que en decadencia, porque o belsetán ha perdito recientment o uso d'este verbo auxiliar en os verbos de movimiento.
Variants Son parlas aragonesas centro-orientals: Aragonés bergotés. Aragonés d'a Ribera de Fiscal. Aragonés d'a Valle de Vio. Aragonés d'a Valle de Puértolas. Aragonés d'a Valle de Tella. Aragonés belsetán.
L'aragonés de Sierra Ferrera presenta actualment una fonetica pareixita a lo chistabín u fovano, clasificatas como aragonés oriental.
Bibliografía Anchel Conte et al. El aragonés: identidad y problemática de una lengua. Colección Aragón. Librería general. Chabier Tomás Arias. El aragonés del biello Sobrarbe. Instituto de Estudios Altoaragoneses, 1999.
Centro-oriental