A concordancia gramatical en aragonés consiste en a transmision d'as caracteristicas morfolochicas flexionals (chenero, numero y persona) d'una palabra a una atra, d'una traza que actua como un recurso gramatical d'as luengas pa marcar as relacions gramaticals entre os diferents constituyents fendo-se referencias cruzadas.
Concordancia nominal Consiste en a coincidencia en chenero y numero entre diferents components
Entre o sustantivo, l'articlo y os adchectivos: O gato negro, a gata negra, ixa dalla viella, ixe pueyo royo
Entre o pronombre y a palabra que bi ha antes u dimpués: A liebre me la mincho yo Lis posé allo a los conillos que cacé
Entre o subchecto y l'atributo, o predicativo u o participio d'o verbo en pasiva: A moncha yera una santa Ixa ciudat fue fundada a primers de sieglo
Concordancia verbal Consiste en a coincidencia de numero u persona entre o subchecto y o verbo: O can se mincha o ueso Os cans se minchan os uesos
En as formas composadas d'os verbos bi ha concordancia en chenero y numero entre o participio y l'obchecto directo unicament si ye en forma de pronombre personal lo, los, la, las u d'o pronombre adverbial en/ne. O gato s'ha minchau a truita O gato se l'ha minchada Un chabalín viello que fozaba s'ha minchau as trunfas Un chabalín viello que fozaba se las ha minchadas
En as parlas aragonesas que conservan o verbo ser como verbo auxiliar en a conchugación d'os verbos reflexivos bi ha concordancia entre o subchecto y o participio igual que en aragonés medieval, pero no bi n'ha en l'aragonés cheneral actual, que fa servir n'este caso o verbo haber. Yo me soi feito socio Nusatros nos semos feitos socios Yo me he feito socio Nusatros nos hemos feito socios
Categoría:Sintaxi de l'aragonés