Este articlo ye sobre una forma d'erosión alveolar; pa atros significaus de la parola Laco, vaiga a Laco (desambigación). thumb|right|Lacos que s'han feito en o granito de La Pedriza (Espanya). Los lacos u gnamas son clots u chicotas depresions que se fan por erosión alveolar en superficies horizontals u cuasi horizontals de ciertas rocas como las piedras panals u las rocas metamorficas y ignias con textura granuta.
L'orichen d'un laco ye una irregularidat en la superficie que retién l'augua y permite que se desarrolle millor la meteorización.
En la depresión d'Ebro las gnamas son bien estudiadas en lo semontano pirenenco, Os Monegros y semontano iberico. Las estratos de piedra panal horizontals u subhorizontals que bi ha en Frayella presentan muitas gnamas. Fernando Biarge: Piedra de arena. El paisaje monegrino. Ediciones del Mallo. 2004, pp 58-78 En Tramacet tamién bi ha gnamas tipicas. Fernando Biarge, José María García Ruiz, Ana Biarge: Roca viva. El modelado del paisaje pirenaico. Diputación de Huesca, 2001. p 100
Denominacions La denominación australiana gnama ye d'uso prou cheneral entre los cheomorfologos de tot lo mundo, pero bi ha muitos nombres locals que pueden amaneixer u no en obras cheormorfolochicas. En la Sierra d'Albarracín los lacos que se fan en lo rodeno se dicen "clochas", parola que puet designar a atros cloz u chicotas depresions de lo terreno en ixa zona u en atras de lo Sistema Iberico aragonés u valenciano. En las zonas graniticas de la Meseta Espanyola reciben la denominación de pilancones.
En parlas altoaragonesas actuals l'uso de "laco" que se documenta con sentiu cheomorfolochico ye por eixemplo: En lo Semontano de Balbastro ye una basa en piedra viva u lenera que se plena con augua que rechuma u con una fuent. En la Val de Rodellar un laco ye un clot que se fa en una lastra y a on permaneixe muito tiempo l'augua. Chesús Vázquez Obrador: Toponimia de Pedruel, Las Almunias y San Hipólito (valle de Rodellar). Argensola: Revista de Ciencias Sociales del Instituto de Estudios Altoaragoneses, ISSN 0518-4088, Nº 87, 1979 , pachinas 103-134
En zonas a on se charró aragonés dica fa pocos sieglos tamién se puet sentir. Por eixemplo en Castelserás un laco ye una chicota depresión en un camín que lo fa incomodo de transitar.
Referencias
Bibliografía Francisco Pellicer Corcellano, María Teresa Echevarría Arnedo: Formas de relieve del centro de la depresión del Ebro. Institución Fernando el Católico. 1989 Fernando Biarge: Piedra de arena. El paisaje monegrino. Ediciones del Mallo. 2004
Se veiga tamién Cadolla.
Categoría:Formas d'erosión alveolar