Os chermanismos en rumano tienen unas circumstancias diferents d'os presents en as luengas romances occidentals por a menor durada d'a presencia chermanica en as primeras invasions barbaras y por haber estau sustuitos por pueblos eslaus y turquicos en as segundas invasions barbaras. A mes gran part d'os chermanismos d'o rumano son alemanismos traitos por os saxons transilvanos, os suabios d'o Danubio y os askenazís. Tamién bi ha palabras d'orichen francico y neerlandés que fan part d'os galicismos d'o rumano, asinas como anglicismos modernos.
Primer estrato de chermanismos S'ha quiesto interpretar palabras como gard ("cleta") y baltă ("paúl") como d'orichen chermanico oriental (a branca chermanica a la que perteneixeba a luenga d'os chipidos y a luenga gotica, d'os godos), pero no ye pas seguro y no ye de descartar que sigan d'orichen daco u eslau, podendo trobar-se-ne cognatos en albanés.
Bi ha chermanismos antigos que plegoron a traviés d'o latín vulgar: Tapă: "cepo". Tufă: "mata", "matigal", "arbusto".
Tudesquismos
En Banato y Transilvania bi ha muitas palabras alemanas, belunas traitas por os saxons transilvanos en o sieglo XIII, belatras pos os suabios d'o Danubio en o sieglo XVIII y por l'administración austriaca en Banato, Transilvania y Bucovina.
Dende as ciudaz saxonas de Sibiu y Braşov muitas d'estas palabras pasoron ta o rumano d'Oltenia y Muntenia por as relacions comercials como por eixemplo: Ferdelă: unidat de mesura de capacidat de 20 litros. Corfă: "canasta", d'o saxón transilvano fyrdel, alemán actual Viertel. Ştreang: "cuerda", de l'alemán Strang. Pîrgar: consellero, ciudadán, a traviés de l'hongaro antigo Purgar, de l'antigo saxón *Purger, equivalent a l'alemán actual Burger. Ladă: "caixa", de l'alemán Lade, a traviés de l'hongaro Láda.
A presencia d'askenazís, que charraban yiddisch, tamién trayó muitos chermanismos: Belfer: mayestre, ayo.
Rumano Categoría:Lexicolochía d'o rumano