O lexico d'o francés ye en a suya mes gran part d'orichen latino, a traviés de diferents vías, con presencia tamién de palabras d'orichen celta galo, chermanico, griego, arabe y argotico.

As palabras patrimonials han seguiu as leyes foneticas d'o francés, a diferencia d'os cultismos, provinients d'un superstrato culto latino y tamién d'o griego. Entre meyo son os semicultismos.

Bi ha atras palabras d'orichen latino que han plegau a traviés d'atras luengas, sobre tot neolatinas. En francés bi ha occitanismos y palabras provinients d'as luengas d'Italia y d'a Peninsula Iberica, y reconoixibles sobre tot como castellanismos y italianismos.

Celtismos

Os celtismos presents en francés son d'orichen galo-britonico, de fueras d'os que han plegau a traviés de l'anglés u d'o castellano. En o mesmo latín galico s'emplegaban muitas palabras que se cheneralizoron en tot o dominio lingüistico latino, y de pueden trobar dende Portugal dica Rumanía. Part d'as palabras d'orichen galo fan part d'o lexico d'as luengas galorromanicas y pueden trobar-se tamién en l'aragonés, que i muga.

En francés bi ha palabras d'orichen galo en o lexico d'o medio rural Gramática francesa. Larousse Editorial, S.A, 2000., pp 161-163, pp 206-208. como arpent, borne, charrue, bec, bouc.

A presencia d'o bretón en Bretanya ha feito que as luengas d'Oil y o francés estándard haigan amprau bretonismos como dolmen.

Helenismos

A introducción d'helenismos en francés presenta aspectos pareixius a los d'as luengas romances occidentals (transmesos por o latín clasico, por o latín eclesiastico, transmesos por l'arabe o italiano u atra luenga dende o griego bizantín u transmesos por o lenguache cientifico y tecnico). Manimenos, s'ha interpretau que unas cuantas palabras como gouffre u ganse s'introducioron en o latín galico dende as colonias griegas foceas de Provenza. O helenismo ganse ye tamién un occitanismo.

Os helenismos transmesos por o latín clasico se distribuyen por diferents campos: fitonimos (thym), zoonimos (seiche), descripción d'o terreno (craie), constumbres (bain), construcción (chambre), trastes, (ampoule, épee), navegación, unidaz de mesura, cultura refinada (idée, comédie, scène, chœur, école, etcetera). Se pueden trobar como palabras patrimonials que siguen as leis foneticas d'a evolución d'o latín enta o francés, manimenos tamién se troban como cultismos y semicultismos por circumstancias particulars que incluyen a reintroducción.

Os helenismos transmesos por o latín eclesiastico s'han transmeso en forma de cultismos y semicultismos (apôtre, diocèse).

O francés medieval ampró helenismos clasicos u bizantins a traviés d'o italiano (ris) u de l'arabe (alchimie). Un helenismo orichinau en o griego bizantín ye galère.

A ciencia y filosofía medievals, renaixentistas y modernas creyoron neolochismos dreitament con radices griegas u con helenismos presos por o latín (céphalopode, paléontologie).

Palabras provinients d'as luengas d'Oil no oficials

Bi ha unas palabras d'orichen latino que no amuestran las leis foneticas de lo francés estándard y que son reconoixibles en las luengas d'Oil, en camín de desapareixer.

En francés estándard las palabras avoine, foin y moins presentan un diftongo -oi- que contrasta con la forma ei de palabras con la mesma vocal en lo sistema vocalico latín vulgar (frein, plein, sein).

La k inicial en palabras que encomienzan por ca ha estau un criterio pa identificar palabras en luengas d'Oil septentrionals como lo normando, lo picardo u lo valón, lo que a vegadas puede estar cierto, pero no siempre, porque en francés tamién bi ha occitanismos que presentan este mesmo fonema inicial (calanque), amés de los abundants italianismos (camp, canaille). S'ha quiesto relacionau requin con lo latín CANIS, que ha dau chien en francés estándard.

Bi ha palabras que pueden tener un orichen local en una luenga d'Oil pero no presentar leis foneticas que las puedan distinguir. En sería un eixemplo la palabra champi ("borde"), que proviene de lo berrichón (luenga d'Oil propia de la rechión de Berry).

En Francés de Belchica bi ha palabras como aubette u drève que son d'etimolochía chermanica. Tamién bi ha palabras con etimolochía latina orichinarias de lo valón como chantoir. La palabra cabaret, d'etimolochía no guaire clara yera en los sieglos XIII y XIV una palabra cuasi exclusiva de la zona valona y picarda, beluns la relacionan con una antiga forma diminutiva de CAMĔRA (*camerete), pero bel autor la considera un neerlandismo.

Bi ha anglicismos en francés que se remontan a palabras de l'anglo-normando.

A vegadas las luengas d'Oïl mantienen palabras con la fonetica orichinal que lo francés estándard ha perdiu. Lo picardo mantiene ameur, que lo francés estándard ha perdiu por la introducción de l'occitanismo amour.

Arpitanismos

L'arpitán u francoprovenzal ha aportau palabras a lo francés. Belunas como avalanche ("lurte") y chalet han puesto plegar en atros idiomas como l'anglés u o castellano. Entre os arpitanismos que han plegau mes luent destacan glacier, moraine, rimaye y sérac que, en as suyas formas adaptadas a cada luenga, son tecnicismos d'o lenguache cheolochico y cheografico relativos a lo sistema morfoclimatico glacial.

Occitanismos

Antes que l'occitán perdese o suyo paper como luenga de cultura en o sud de Francia, o norte yera receptivo a la plegada de palabras occitanas. Dimpués que l'occitán perdés o suyo paper, continoron entrando occitanismos en francés como part d'o francés rechional u pa dar nombre a elementos propios d'o sud de Francia.

Castellanismos

A Espanya d'o Sieglo d'Oro exerció una influencia cultural en Francia a traviés d'a literatura y d'o prestichio que li daba o poder militar. As imprentas de Bruselas, León d'el Roine y París publicaban a sobén obras espanyolas y mesmo en castellano. O maximo d'esta influencia se dió en ixas envueltas de Loís XIII y d'Ana d'Austria. Rafael Lapesa: Historia de la lengua española, Editorial Gredos, 2001. pp 291-296.

Son castellanismos introducius en estos tiempos y relacionaus con sociedat cortesana, a literatura, a musica, as fiestas, etcetera: brave, bravoure, désinvolte, grandiose, fanfarron, matamore, hâbler , compliment, grandesse, sieste, guitare, castagnette, passacaille.

Tamién s'introducioron castellanismos ligaus a lo comercio, guerra y actividaz cotidianas: morion, adjudant, embargo, supracargo, falouque, basquine, ropille, alcôve, camarade, manille, matador, quinola, cédille, oraison de quietude, la foille du logis, recuieillement. Os americanismos d'o castellano tamién podioron entrar en francés (patate, maïs).

Lusismos

No bi ha una continuidat territorial entre o dominio galaicoportugués y o francés, por o que os contactos han estau a traviés d'a navegación maritima, o comercio internacional, a presencia europea en as colonias d'Ultramar, a divulgación cientifica de descubrimientos en as colonias, etcetera.

Bi ha pocos lusismos que haigan plegau a lo francés travesando a Peninsula Iberica a traviés de l'astur-leyonés, o castellano y l'aragonés (embarrasser, pintade). Bi ha arabismos que plegoron a lo francés a traviés d'o portugués (albacore, marabout y seguntes bel autor abricot).

O portugués tamién estió vía d'entrada d'americanismos (jaguar, couguar, coati), d'africanismos (banane), y de palabras d'as costas de l'Indico (bambou, jangada, copra, jonque).

O pareixiu d'o castellano y o portugués, un contexto colonial pareixiu y o mesmo ambient de contactos por navegación maritima fan que a vegadas siga dificil saber si una palabra ha estau transmesa por la una y l'atra luenga (nègre, sombrer). Tamién s'ha quiesto interpretar bel lusismo u castellanismo dubdoso a partir d'o catalán (abricot).

Italianismos

A mes gran part d'os italianismos entroron en o sieglo XVI, en tiempos d'o Renaiximiento y d'a intervención francesa en as Guerras d'Italia de 1494-1559.

Os campos lexicos en os que abundan os italianismos son a guerra (escadron, escorte), a navegación maritina (misaine, palan), l'alimentación (brocoli, cannelle), l'arquitectura (esplanade, estrade, façade), l'art (fresque, mosaïque), a musica (opera, piano), a ropa (ombrelle, perruque) y a banca (banqueroute, bilan).

Chermanismos

Os chermanismos d'o francés se distribuyen en uns cuantos estratos. O primer estrato ye representau por as palabras d'orichen chermanico que ampró o latín vulgar antes d'evolucionar enta as diferents luengas romances y que son presents en buena part d'estas luengas. O segundo estrato ye representau por palabras d'orichen francico d'a clase dirichent d'o Reino Franco, y en menor mesura por palabras orichinadas a partir d'a luenga d'os burgundios que yeran establius en o Reino Burgundio d'o sud-este. O tercer estrato ye representau por as palabras provinients d'os dialectos chermanicos que iban evolucionando a partir d'o francico. O cuatrén estrato ye representau por as palabras d'orichen escandinavo y por as primeras palabras que entroron dende l'anglés antigo. O cinquén estrato ye representau por as fases baixo-medievals d'as luengas chermanicas que bi heba en contacto con o francés medieval: anglés meyo y as formas medievals d'o diastema alemán ("neerlandés meyo", "baixo alemán meyo", "alamanico meyo", etcetera). En este estrato son as palabras d'orichen neerlandés as mes numerosas, seguidas por palabras d'orichen baixo alemán y anglés arribadas por un trafico comercial con o Ligallo Hanseatico y con Anglaterra respectivament. O seisén estrato ye o zaguer y ye representau por todas as palabras chermanicas que entroron dende o sieglo XVI. Encara que continó a entrada de palabras d'orichen alemán y neerlandés, ya como luengas estándard clarament despartidas, destaca a introducción de lexico anglés moderno. Dende un periodo d'anglomanía en o sieglo XVIII, a influencia lexica de l'anglés ha estau creixient, y en o sieglo XIX encomenzó una introducción masiva de lexico esportivo, industrial y ferroviario. A industria cinematografica d'os sieglos XX y XXI han feito continuar esta tendencia, sobre tot con anglicismos provinients de l'anglés americano. Carlo Tagliavini: Origenes de las lenguas neolatinas. Fondo de Cultura Economica. 1973, pp 404-416.

Chermanismos d'orichen francico

En as primeras invasions barbaras os francos d'apoderoron de Galia y constituyoron una clase dirichent en o norte. As dinastías d'os Merovinchios y Carolinchios yeran d'orichen franco. A luenga chermanica d'os francos ye conoixida como "francico" y aportó muitas palabras a las incipients luengas galorromanicas. Estas palabras a vegadas amuestran as mesmas leis foneticas que afectoron a las palabras patromimonials d'orichen latino, a diferencia d'os chermanismos mes recients d'orichen escandinavo, alemán, neerlandés u anglés.

Muitas palabras d'o francico fuoron ampradas por as luengas galorromanicas, dende a on que pasoron a l'aragonés y atras luengas occidentals como galicismos. Os chermanismos d'orichen francón corresponden a las variants septentrionals u baixas, de fueras de bella excepción como échevin, que se documenta en latín medieval local como scabinus y corresponde a l'alto alemán sceffin y a lo francón skapin ("chuez" u "machistrato").

O francés ampró palabras franconas con h aspirada y que encara huei no pueden fer liaison. Os antroponimos francos con a terminación -hart ("duro") entroron primer con antroponimos como Bernhart y Reginhart y pasoron dimpués a substantivos comuns y adchectivos convertindo-se en o sufixo -ard, que dimpués pasó dende o francés y l'occitán a l'aragonés como -ardo.

O mesmo se puede dicir sobre l'orichen d'o sufixo -aud que entró con antroponimos feitos con a terminación -wald (Guiraud, Regnaud), y que, a traviés de l'occitán, plegó dica o benasqués como -au (patau, pipau). José Antonio Saura Rami: Elementos de fonética y morfosintaxis benasquesas, Zaragoza, Gara d'Edizions-Institución Fernando el Católico (2003), pp 304-305.