A fala ye una variedat romance d'o subgrupo galaicoportugués parlada en os municipios de Sa Martín de Trevellu, As Ellas y Valverdi du Fresnu, toz éls en a Val de Xálima, a o nord-ueste d'a provincia espanyola de Cáceres, chunto a la muga portuguesa y a muga provincial de Salamanca.
Ye tamién nombrada de cuantas formas: fala de Xálima, xalimés, xalimegu, mañegu, a fala d'acá, a nossa fala y chapurráu (en Valverdi) u, por os partidarios d'a teoría sobre a relación entre a fala y o idioma gallego, gallego d'Extremadura u galaicoextremenyo. S'ha de sinyalar que ye mugant con l'alto-extremenyo d'a redolada, incluyindo a palra d'El Rebollal en Salamanca, a sobén considerada leyonés.
En cada lugar se dan particularidaz dialectals (por lo que etimolochicament resultaría mas correcta a denominación mas chenerica d'as falas), encara que son prou intelichibles entre sí y respecto a o gallego u o portugués. Istas variants gosan denominar-se lagarteiru (As Ellas), manhegu/mañegu (Sa Martín de Trevellu) y valverdeiru (Valverdi du Fresnu).
Contando a toz os habitants d'os tres lugars s'estiman bels 6000 parlants, encara que atras fuents puyan a cifra dica os 10 000, por os nativos que treballan difuera d'istas localidaz pero muitos d'éls tornan ta la val de verano.
Vinclos externos Ficha d'a Fala (FAX) en Ethnologue Ficha d'a Fala en PROEL Decreto 45/2001 Declaración de A Fala como bien de interés cultural.
Categoría:Luengas d'Extremadura Categoría:Luengas d'Espanya