Lo golfo de Mexico ye una cuenca oceanica situada entre los litorals de Mexico, Estaus Unius y Cuba. Los estaus mexicanos que tienen costa en este golfo son Tamaulipas, Veracruz, Tabasco, Campeche, Yucatán; los estadounidenses son Florida, Alabama, Misisipi, Luisiana y Texas; y las provincias cubanas son Pinar d'o Río y Artemisa. La peninsula de Florida y la isla de Cuba ocupan la parte oriental d'o golfo, an se troba la salida d'este enta lo oceano Atlantico, mientres que la peninsula de Yucatán, tamién a l'oriente, desepara a lo golfo d'a mar Caribeque chunto a este forman la mar Mediterrania Americana.
Lo golfo de Mexico se formó fa aproximadament 300 millons d'anyos como resultau d'a tectonica de placas. La cuenca d'o golfo de Mexico tiene una forma mas u menos ovalada y tiene aproximadament 1.500 km d'amplaria. Lo suyo fondo ye formau per penyas sedimentarias y sedimentos recients. Ye connectau a parte d'o oceano Atlantico a traviés d'o estreito de Florida entre los Estaus Unius y Cuba, y con o mar Caribe a traviés d'a canal de Yucatán entre Mexico y Cuba. A causa d'a suya estreita connexión con o océano Atlantico, lo golfo experimenta oscilacions de mareya chicotas. La grandaria d'a cuenca d'o golfo ye d'aproximadament d'1,6 millons de km 2. Quasi la metat d'a cuenca d'a plataforma continental ye formada per auguas de poca fondaria.
Toponimia Lo nombre d'o golfo deriva d'a parola mexica, que ye un endonimo náhuatl azteca. Encara que no existe un protocolo formal sobre la denominación cheneral d'as auguas internacionals, «golfo de Mexico» ye oficialment reconoixiu per la Organización Hidrografica Internacional, que busca estandarizar los nombres d'as formacions maritimas internacionals pa bells propositos y cuenta a los tres países adchacents a lo golfo como Estaus miembros.
Los mapas de prencipios d'o sieglo XVI de Juan de la Cosa y Martin Waldseemüller describiban lo golfo, encara que lo deixaban sin nombrar. Un mapa de 1584 d'Abraham Ortelius lo nombró como «mar d'o Norte» (). Hernán Cortés tamién lo clamó per este nombre, en os suyos despachos, mientres que atros exploradores espanyols lo clamoron golfo de Florida u golfo de Cortés. Atros mapas europeus antigos lo clamaban golfo de San Miguel (en latín: Sinus S. Michaelis), golfo de Yucatán (en latín: Golfo de Iucatán), mar de Yucatán (en latín: Mare Iuchatanicum), gran golfo d'as Antillas (en latín: Signus Magnus Antillarum), mar de Catay (en latín: Mare Cathaynum) u golfo de Nueva Espanya. Lo Virreinato de Nueva Espanya plegó a rodiar lo golfo y os suyos dominios s'extendeban per lo que actualment ye lo sudeste d'Estaus Unius.
Lo nombre de golfo de Mexico (en anglés : Gulf of Mexico; en francés: golphe du Mexique, dimpués golfe du Mexique) amaneixió per primera vegada en un mapa mundial en 1550 y en un relato historico en 1552. Ha estau lo nombre mas común dende meyaus d'o sieglo XVII, cuan encara se consideraba un mar espanyol. Los jesuitas franceses utilizoron iste nombre ya en l'anyo 1672. En o sieglo XVIII, las cartas de l'almirantau espanyol etiquetoron a lo golfo de traza semellant como Ensenada Mexicana u Sino Mexicano. Dica la deseparación d'a Republica de Texas de Mexico en 1836, lo limite costero mexicano s'extendeba enta lo este a lo largo d'o golfo dica l'actual Loisiana.
En 2025, lo president d'os Estaus Unius, Donald Trump, sinyó la Orden Executiva 14.172 que instruyó a lo secretario de l'Interior adoptar lo nombre de Gulf of America en a nomenclatura ofical a ser usada per lo gubierno d'os Estaus Unius en o suyo idioma, especificando una aria d'a plataforma continental d'os Estaus Unius que s'extiende dica lo limite maritimo con Mexico y Cuba. Ixe nombre s'heba utilizau anteriorment humoristicamente, como en The Colbert Report en 2010 y en un prochecto de lei satirico de 2012 d'o lechislador de Misisipi Steve Holland. Lo Departamento de l'Interior d'Estaus Unius confirmó que l'uso d'o nombre de Gulf of America dentraba en vichencia en as achencias federals estadounidenses lo 24 de chinero de 2025, encara que lo cambio no s'aplica en un contexto internacional. Cuantos organismos y meyos de comunicación reaccionoron a l'acción federal y la mayoría expresó que prevalería l'uso común. Google Maps alternará lo nombre que se visualiza en función d'a ubicación de l'usuario.
Cheografía Lo golfo de Mexico y lo mar Caribe forman una rechión marítima d'o Oceano Atlantico que se troba quasi completament rodiada per lo continente americán y per islas. Per este motivo, la combinación de totz dos ye conoixida tamién como mar Mediterranio Americán. Mexico poseye extensas plataformas continentals que se adentran en o mar, en cambio las plataformas d'o Caribe son mas reducidas y rematan en simas que plegan a fondarias d'entre 2.000 a 3000 metros de profundidat. Son abundants los estudios cientificos levaus a cabo en totz dos mars; manimenos, la historia d'a suya evolución cheolochica encara presienta importants lagunas de conoixencia. En tanto lo mar Caribe presienta fenomenos sismicos y erupcions volcanicas de forma aislada.
Totas dos rechions marítimas son unidas a lo oceano Atlantico a traviés de numerosos estreitos y pasos los quals a traviés de numerosas canals s'ubren paso a lo oceano. Manimenos, l'intercambio de masas d'augua entre las distintas cuencas marinas ye limitau, dau que las zonas de comunicación gosan estar d'auguas poco profundas. La canal de Yucatán une lo mar Caribe con o golfo de Mexico. Las auguas d'o Caribe son claras, con una menor salinidat que las de l'Atlantico y circulan en sentiu contrario a las agullas d'o reloch. L'augua fluye enta lo Caribe prencipalment a traviés d'os estreitos d'as Antillas Menors, an se calienta y abandona la rechión per la canal de Yucatán enta lo golfo de Mexico. Lo mar Caribe se troba en a zona d'os alisios d'o norte y, per tanto, se caracteriza per la constant presencia d'aires de component este. Las mayors precipitacions tienen lugar mientres lo verano tropical, quan tamién se produz la plegada a lo Mediterranio americán d'a mayoría de ciclones tropicales procedents de l'Atlantico, mientres que son escasos los que se forman localment.
Biolochía Las calidas auguas d'o golfo de Mexico y d'a mar Caribe albergan un d'os ecosistemas mas espectaculars y con mayor diversidat biolochica d'os mars. Amás d'especies raras como lo manatí u vaca marina, los delfines moteados y los tiburons ballena, abundan tamién las tortugas marinas, los aligators y diversas especies de grullas. Lo golfo de Mexico, en particular, destaca per la suya riqueza pesquera; las especies gastonomicament más importants son: la truita de mar, lo salvelino, lo lenguado, la caballa, la tonyina, lo peix vela, la mojarra y lo mero.
La rechión padeixe grieus problemas medioambientals. Lo turismo, la pesca esportiva y la pesca comercial ya han degradau qualques chicotas islas coralinas. Los pescadores de gambas locals s'enfrontinan con os protectors d'as tortugas y los ecolochistas se preocupan per las elevadas capturas accidentals d'especies menazadas. Manimenos, en os zaguers anyos s'ha aconseguiu aturar lo declive de qualques especies de pelicanos (Pelecanus erythrorhynchos y Pelecanus occidentalis carolinensis) y grudas; amás, actualment los grupos ecolochistas dedican más atención a la protección de muitas d'as chicotas islas.
Economía Productos como lo petrolio y lo gas natural, los minerals de fierro y bauxita, lo azúcar, lo café y las bananas son beluns d'os bienes comercials mas importants d'o Mediterranio americán. En esta rechión marítima i hai milars de plataformas de prospección petrolifera y refinerías, per lo que ye practicament inevitable que se produzcan vertius accidentals y incendios en as plataformas que son difícils de controlar. Amás, esta rechión tiene una fuerte dependencia economica d'o comercio americán y europeu, asinas como d'a industria d'o turismo.
Acuerdos de delimitación fronteriza marítima
26 de chulio de 1976, acuerdo entre los Estados Unidos Mexicanos y la Republica de Cuba sobre delimitación d'os espacios maritimos entre éls, en las arias a on ditos espacios son colindantes en virtut d'o establimiento d'a zona economica exclusiva de Mexico y la eventual creyación d'una zona economica de Cuba. 23 de noviembre de 1970, tractau entre los Estaus Unius d'America y Los Estaus Unius Mexicans pa resolver diferencias pendients en as mugas y pa mantener a los ríos Bravo y Colorado como la muga internacional entre los Estaus Unius Mexicans y los Estaus Unius d'America. 4 de mayo de 1978, tractau pa esmugar los limites maritimos entre los Estaus Unius Mexicans y los Estaus Unius d'America. 9 de chunio de 2000, tractau entre lo Gubierno d'os Estaus Unius Mexicans y lo Gubierno d'os Estaus Unius d'America sobre la delimitación d'a plataforma continental en a rechión occidental d'o Golfo de Mexico, dillá d'as 200 millas nauticas. 16 d'aviento de 1977, los Estaus Unius d'America y La Republica de Cuba, fan un alcuerdo sobre los limites marítimos entre los Estaus Unius d'America y la Republica de Cuba .
Historia Encara que Cristóbal Colón ye acreditado como lo descubridor d'America, garra d'os suyos barcos en os suyos quatro viaches plegoron a lo golfo de Mexico. En l'anyo 1492 prenió posesión d'as Bahamas en nombre d'a Corona espanyola, convenciu d'haber trobau una nueva rota marítima enta Asia. Colón en os viaches posteriors nomás exploró lo mar Caribe. Lo primer europeu que exploró en auguas d'o golfo de Mexico estió Américo Vespucio en 1497. Siguió la linia costera continental d'América Central antes de tornar a lo oceano Atlantico a traviés d'o estreito d'a Florida, entre la peninsula d'a Florida y Cuba. En as suyas cartas, Vespucio describió este viache y una vegada que Juan de la Cosa tornó a Espanya realizó un famoso mapa que ya represienta a Cuba como una isla (mapa de Juan de la Cosa).
En 1506, Hernán Cortés prenió parte en a conquiesta de La Espanyola y de Cuba, recibindo una gran propiedat de tierra y esclaus indios per lo suyo esfuerzo. En 1510, acompanyó a Diego Velázquez de Cuéllar en a suya expedición pa la conquiesta de Cuba. En 1518 Velázquez le encarregó lo mando d'una expedición pa explorar y asegurar l'interior de Mexico pa la colonización.
En 1517, Francisco Hernández de Córdoba descubrió la peninsula de Yucatán, estando lo primer europeu que se trobó con una civilización abanzada en o continente americán y que contaba con edificios de construcción solida y una organización social complexa que reconoixió comparables con as d'o Viello Mundo; tamién tenió razón pa asperar que en ixa nueva tierra i habría oro. Tot esto alentó dos expedicions mas, la primera en 1518, baixo lo mando de Juan de Grijalva, y, la segunda en 1520, baixo lo mando d'Hernán Cortés, que condució a la exploración espanyola, la invasión militar y en zaguera instancia los asentamientos y la colonización conoixida como conquiesta de Mexico. Hernández no vivió pa veyer la progresión d'a conquiesta: murió en 1517, l'anyo d'inicio d'a suya expedición, como conseqüencia d'as lesions y la set extrema sufierta mientres lo viache, y decepcionau en saber que Diego Velázquez heba dau prioridat a Grijalva como capitán d'a siguient expedición a lo Yucatán.