Juan Isidro Miralles García (Forcallo, 1905 - Zaragoza, 1986) estió un anarcosindicalista y politico valenciano, consellero d'Agricultura d'o Consello Rechional de Defensa d'Aragón.
Biografía Naixiu de Forcallo, lugar d'o Mayestrato Viello mugant con a provincia de Teruel. En prencipiar a Guerra Civil Espanyola s'alistó como comisario d'o batallón d'Agustín Remiro. En creyar-se o Consello Rechional de Defensa d'Aragón dentró a colaborar como subsecretario d'Agricultura, con Adolfo Arnal Gracia como consellero, substituyindo a iste a o frent d'a cartera dende abril dica a suya desaparición en agosto de 1937.
En setiembre de 1937 pasó a fer parti d'o comité rechional d'a CNT por Teruel y en 1938 luitó en a batalla de l'Ebro en a 46ena División mandada por o tenient coronel Valentín González, "El Campesino". En a zaguera fase d'a guerra, cuan l'exercito republicano yera en retacule, trescruzó a muga enta Francia en febrero de 1939, arribando enta a placha d'Argelers, fendo dende astí parti d'as guerrillas pirinencas.
En prencipiar a Segunda Guerra Mundial s'alistó en a Resistencia francesa, estando preso luego y ninviau ta un campo de concentración alemán, d'a on eslampó, tornando a unir-se a las milicias y fendo parti d'a liberación de París.
En l'anyo 1955 se'n fue ta Chile a on conoixió a la suya muller, a zaragozana Quiteria Serrano, y tenió dos fillos. Astí vivió tamién o golpe de Estau de 1973 protagonizau por o cheneral Augusto Pinochet. En chulio de 1980 tornó ta Zaragoza, a on morió en 1986.
Vinclos externos Isidro Miralles García en Con Nombre & Apellidos. Ficha en Service historique de la Défense. Expo Consejo de Aragón
Categoría:Anarquistas d'o País Valenciano Categoría:Gubierno Ascaso Categoría:Muertos en Zaragoza Categoría:Naixius d'a provincia de Castellón Categoría:Politicos d'o País Valenciano Categoría:Sindicalistas d'o País Valenciano Categoría:Sindicalistas d'a Confederación Nacional del Trabajo Categoría:1905 (naixencias) Categoría:1986 (muertes)