Raimondo Montecuccoli foi un xeneral italianu que tamién sirvió como xeneral pa los Austries y foi príncipe del Sacru Imperiu Romanu Xermánicu y duque napolitanu de Melfi. Consideráu por munchos como l'oficial más relevante de la so dómina, combinó una destacada carrera militar col analís intelectual del arte de la guerra.
Biografía En 1627, el mozu Raimondo ingresó nel exércitu del Sacru Imperiu Romanu Xermánicu y ilue empezó a evidenciar talentu pa la milicia. A partir de 1629 participó nes batalles de la Guerra de los Trenta Años. Foi mancáu y capturáu más d'una vez. Inclusive tando en reteníu , realizó con frecuencia estudios militares.
Tres la paz de Westfalia foi incluyíu nuna comisión que tenía como finalidá planiar la reconstrucción del Sacru Imperiu Romanu Xermánicu.
En 1658 lluchó contra los suecos en Polonia. Cuando les tropes de Carlos X Gustavu de Suecia invadieron Dinamarca en 1659, Raimondo Montecuccoli foi inviáu a Holstein n'ayuda de los daneses y punxo sitiu a Sønderborg, siendo mancáu llevemente nel brazu.
En 1661 l'Imperiu Otomanu invadió Transilvania. Leopoldu I d'Habsburgu llevantó un exércitu pa defender los sos territorios y punxo a la cabeza del mesmu a Montecuccoli. Sicasí, el xeneral protestó porque l'exércitu taba mal abastecíu, lo que provocó que que los otomanos llograren l'ésitu. Por cuenta de estos defectos, produciéronse otros ésitos militares otomanos y en 1663 Érsekújvár cayó n'Hungría. Tres la cayida d'esta ciudá, Montecuccoli aportunó al emperador de qu'empecipiara negociaciones con Francia, gracies a les cualos Lluis XIV de Francia unvió seis mil homes sol mandu de Jean de Coligny-Saligny, quien sirvieron sol mandu de Montecuccoli na campaña de 1664.
El choque ente les tropes francu-imperiales y otomanos tuvo llugar na batalla de San Gotardu (Szentgotthárd) (1 d'agostu de 1664) cerca del ríu Raba. Los otomanos fueron derrotaos dafechu y tuvieron que retirase. La victoria de San Gotardu reportó a Montecuccoli una gran reputación y valió-y l'ascensu al rangu de teniente xeneral de los exércitos imperiales.
En 1666 foi designáu embaxador énte España pa concretar el matrimoniu del emperador Leopoldu con Margarita Teresa d'Austria, fía de Felipe IV d'España, ocasión na que recibió el Toisón d'Oru.
En 1673 españó la guerra con los franceses polos Países Baxos. Montecuccoli foi puestu al frente de un exércitu nel Rin. Montecuccoli atacó les sos bases de suministru y obligó al exércitu francés a retirase a Philippsburg, ocasión qu'aprovechó Montecuccoli pa marchar al norte y xunise a Guillermu d'Orange ente Mainz y Andernach. Depués avanzó al través del Rin, cerca de Koblenz, y obligó al exércitu francés de François-Henri de Montmorency a retirase, lo que dexó al exércitu imperial-holandés tomar Bonn. A pesar d'estos ésitos, Montecuccoli foi sustituyíu por Federicu Guillermu I de Brandemburgu, siendo unviáu a un frente secundariu n'Holanda.
Dempués de la guerra, yá nun dirixó nengún exércitu. A la so llegada a Viena diéron-y el títulu de Príncipe del Imperiu.
En 1680 foi invitáu por Leopoldu I por que lu acompañara nun viaxe a Italia, onde Carlos II d'España concediera a Montecuccoli'l ducáu de Melfi en Nápoles. Morrió como resultáu d'un accidente nuna visita a Linz en 1680 antes del so viaxe a Italia.
El carácter peculiar de Montecuccoli llevólu a compaxinar una destacada carrera militar con un llabor d'análisis intelectual de la guerra que foi reconocíu como innovador por personaxes como Federicu II el Grande de Prusia o Jean-Charles de Folard.
Taba convencíu de la superioridá de la potencia de fueu ya introdució un nuevu tipu de mosquete llixeru. Amontó sustancialmente la proporción de los mosqueteros sobro los piqueros y creó los granaderos como fuerza d'élite.
Referencies
Bibliografía
Enllaces esternos
Categoría:Militares d'Italia