La industria aeroespacial ye'l sector industrial dedicáu al diseñu, desenvolvimientu, fabricación, mantenimientu y operación d'aeronaves, naves espaciales, satélites, vehículos de llanzamientu y los sos componentes y sistemes. Inclúi tanto la aeronáutica, relacionada col vuelu dientro de l'atmósfera terrestre, como l'actividá espacial.
El sector engloba actividaes mui diverses, dende la fabricación d'aviones comerciales y militares hasta la construcción de motores, sistemes electrónicos, satélites de comunicaciones y observación terrestre, sondes espaciales y cohetes. Tamién inclúi servicios venceyaos al mantenimientu d'aeronaves, los llanzamientos espaciales y les infraestructures terrestres necesaries pa les operaciones aeronáutiques y espaciales.
La industria aeroespacial desenvolvióse especialmente a partir del sieglu XX, impulsada primero pola espansión de l'aviación y, dende finales de la década de 1950, pola Era espacial. Tradicionalmente tuvo una participación importante de los estaos por cuenta del so valor estratéxicu, los altos costes de desarrollu y la relación col sector de la defensa. Dende finales del sieglu XX y principios del sieglu XXI aumentó la participación d'empreses privaes nes actividaes espaciales, especialmente nel llanzamientu de satélites, les telecomunicaciones y el desenvolvimientu de vehículos reutilizables.
Ente los principales polos de la industria aeroespacial mundial tán los Estaos Xuníos, Europa, China, Rusia, Xapón, India y Canadá. El sector inclúi grandes fabricantes como Airbus, Boeing, Lockheed Martin, Northrop Grumman o SpaceX, amás d'una amplia rede d'empreses especializaes en componentes, materiales, electrónica y servicios.
Ver tamién Industria aeronáutica Industria espacial Axencia espacial Esploración espacial
Referencies
Enllaces esternos
Categoría:Industria Categoría:Aeronáutica Categoría:Vuelo espacial