Domingo Álvarez Acebal foi un maestru, matemáticu y escritor asturianu. Destacó especialmente pola so dedicación a la enseñanza y a la cultura avilesina.
Biografía Na so mocedá emigró a Cuba, pero tornó dempués a Avilés tras dos cortes estancies. Al volver, incorporóse como profesor al Colexu de la Merced, fundáu pol so hermanu Cástor Álvarez Acebal. En 1875 pasó a ser el so director, cargu nel que permaneció cerca de cincuenta años.
En 1879 entró a formar parte de la Escuela d’Artes y Oficios d’Avilés, institución a la que dedicó munchos años de la so vida como profesor y educador. La so formación matemática foi en bona midida autodidacta y tuvo nes matemátiques una de les sos principales especialidaes.
Amás de profesor y matemáticu, foi tamién escritor. Dende mozu collaboró nos periódicos locales, como El Eco de Avilès, y escribió tanto en prosa como en versu, principalmente con un tonu humorísticu y satíricu. Firmaba dalgunos de los sos escritos colos pseudónimos K-Melo, Mingo Revulgo y Dogomín.
En 1880 publicó en Avilés la obra Programa práctico sobre lecciones de Álgebra para la Escuela de Artes y Oficios de Avilés, dedicada a la enseñanza de les matemátiques.
La so importancia pa la vida cultural y educativa d’Avilés fixo que, en septiembre de 1922, la villa-y dedicara una plaza. El 1 d’abril de 1923 descubrióse ellí un bustu de bronce en memoria del profesor y matemáticu. Anguaño, la plaza sigue llevando’l so nome.
Referencies
Enllaces esternos
En encanto de Avilès Biografìas Asturias
Categoría:Maestros y maestres d'Asturies Categoría:Persones d'Avilés