Gamma Trianguli (γ Tri / 9 Trianguli / HD 14055) ye la tercera estrella más brillosa de la constelación de Triangulum con magnitú aparente +4,03, detrás de β Trianguli y Metallah (α Trianguli). Xunto a δ Trianguli y 7 Trianguli forma un curiosu sistema triple pal observador, anque en realidá les tres estrelles nun tán rellacionaes. δ Trianguli alcuéntrase a 35 años lluz, 7 Trianguli a cuasi 300 años lluz, y Gamma Trianguli a una distancia entemedia, 118 años lluz. A cencielles coinciden na mesma llinia de visión.
Con una temperatura envalorada de 9200 K, Gamma Trianguli ye una estrella blanca de la secuencia principal de tipu espectral A1V, non bien distintu a Siriu (α Canis Majoris). La so lluminosidá ye equivalente a 28 soles y el so radiu ye 2,1 vegaes más grande que'l radiu solar. Ye una moza estrella que la so edá envalórase nunos 200 millones d'años.
L'estudiu del so espectru amuesa que la so velocidá de rotación ye bien alta, similar a la d'estrelles como Altair (α Aquilae). Xira alredor de sigo mesma a una velocidá de siquier 208 km/s, completando una vuelta en 12 hores o menos. Comparando esti datu col periodu de rotación del Sol —pocu más de 25 díes—, llógrase una velocidá 104 vegaes mayor que la de la nuesa estrella.
Referencies
Gamma Trianguli (SIMBAD) Gamma Trianguli (Stars, Jim Kaler)
Categoría:Estrelles Categoría:Estrelles blanques de la secuencia principal Categoría:Constelación de Triangulum