IRC-10414 ye una estrella superxigante colorada y amás estrella fuxitiva asitiada na constelación del Escudu, que forma una pareya cola estrella Wolf-Rayet WR 114.
Carauterístiques
Trátase d'un astru d'espectru M7 bien notable por ser una de les pocoñín de superxigantes coloraes productores d'arcu de choque -les otres dos conocíes son Betelgeuse y Mu Cephei, amás nel casu del producíu por esta estrella siendo visible tamién nel ópticu y non solamente nel infrarroxu-. El so vientu estelar ta amás ionizado poles estrelles del cúmulu abiertu NGC 6611, asitiáu na Nebulosa de l'Águila, y/o pola so compañeru -siquier aparentemente- WR 114.
La distancia exauta a esti astru nun ye bien conocida, envalorándose dende 2 quiluparsecs en base a la so paralax y proximidá a la Nebulosa de l'Águila, la Nebulosa Omega, y el cúmulu abiertu NGC 6604 -los trés asitiaos a distancies similares del Sol, del orde de 2 kiloparsecs tamién-; l'estudiu de los masers d'agua presentes alredor de la estrella suxeren una distancia cimera, del orde de 3 kiloparsecs. Sicasí'l llugar de nacencia d'esta estrella nun ta claro, y nin la so dinámica nin la so edá suxeren que naciera nuna de les trés rexones de formación estelar mentaes.
Asumiendo una distancia de 2 kiloparsecs y una temperatura superficial de 3300K, IRC-10414 ye 160.000 vegaes más brillosa que'l Sol y el so diámetru ye alredor de 1.200 vegaes el del Sol, lo que la asitia ente les más grandes conocíes. Acordies con modelos d'evolución estelar, la so masa inicial taría ente 20 y 25 mases solares, y la so edá ente 6 y 10 millones d'años.
WR 114
WR 114, tamién conocida como HD 169010, ye una estrella de Wolf-Rayet d'espectru WC5 asitiada aparentemente cerca -45 segundos d'arcu- d'IRC-10414. La distancia envalorada pa ella (2 quiluparsecs) ye similar a la envalorada para IRC-10414, siendo aproximao 220.000 vegaes más brillosa que'l Sol y solamente 2,5 mayor que'l nuesu astru, superando en rellumu a la superxigante colorada gracies a la so elevada temperatura superficial de 79.000K, frente a los 3300K que s'envaloren para IRC-10414.
Anque s'envalore una distancia similar pa WR 114, la separación real cola so vecina nun ta clara, yá que si les dos estrelles tuvieren a la mesma distancia del Sol y la separación aparente fora la real los fuertes vientos solares de la estrella Wolf-Rayet torgaríen que la superxigante colorada pudiera formar un arcu de choque. Per otru llau suxirióse qu'IRC-10414 y WR 114 formaron en tiempos parte d'una estrella triple güei sumida, moviéndose más o menos conxuntamente pel espaciu; yá que los parámetros dinámicos de WR 114 conócense bien mal ye difícil resolver esti misteriu.
Referencies
.
Categoría:Estrelles Categoría:Superxigantes coloraes Categoría:Estrelles de Wolf-Rayet Categoría:Constelación de Scutum