Irene María Montero Gil ye una política y psicóloga española, miembru de la direición de Podemos. Dende xineru de 2016 ye diputada por Madrid nel Congresu de los Diputaos y dende febreru de 2017 voceru del Grupu Confederal Xuníos Podemos-En Comú Podem-En Marea nel Congresu.
Trayeutoria Estudió nel colexu Sieglu XXI del barriu de Moratalaz en Madrid. Afilióse a les Mocedaes Comunistes (UXCE) a los 16 años. Ye llicenciada en psicoloxía pola Universidá Autónoma de Madrid, tien un máster en Psicoloxía de la Educación (2013) y foi becaria de doctoráu na Universidá Autónoma de Madrid con una beca de Formación de Profesoráu Universitariu. Xunióse a Podemos tres les eleiciones al Parllamentu Européu de 2014 xunto a Rafa Mayoral dende la Plataforma d'Afectaos pola Hipoteca (PAH).
En payares de 2014, en siendo candidata al Conseyu Ciudadanu de Podemos foi nomada responsable de Movimientos Sociales y entamó a dirixir el gabinete del líder de Podemos, Pablo Iglesias momentu nel qu'aplazó'l so proyeutu de tesis doctoral sobre nuevos métodos d'inclusión educativa pa dedicase por completu a Podemos.
Foi candidata por Madrid al Congresu de los Diputaos por Podemos nes eleiciones del 20 d'avientu de 2015, siendo escoyida diputada de la XI y la XII Llexislatura. Dende'l 18 de febreru de 2017 desempeña'l cargu de voceru del Grupu Confederal Xuníos Podemos- En Comú Podem- En Marea, siendo la vocera más nueva de la democracia.
Mientres la campaña eleutoral del 20 d'avientu de 2015, Iglesias anunció que Montero sería la vicepresidenta y ministra de la Presidencia d'un hipotéticu gobiernu de Podemos.
Nes eleiciones del Congresu de Vistalegre II a la direición de Podemos foi escoyida miembru del Conseyu Ciudadanu Estatal. Foi la muyer más votada, asitiándose nel cuartu puestu, tres Pablos Iglesias, Pablo Echenique y Íñigo Errejón. Anguaño ye miembru de la Mesa de Coordinación de Podemos, secretaria d'Aición nel Congresu y xefa del gabinete de Pablo Iglesias.
Como diputada, en xunu de 2017 se convirtió na primer muyer na historia d'España qu'intervien nel parllamentu nuna moción de censura.
Referencies
Enllaces esternos
Ficha de na páxina oficial de Tresparencia de Podemos.
Categoría:Persones de la Comunidá de Madrid Categoría:Políticos y polítiques d'España Categoría:Políticos y polítiques de Podemos Categoría:Diputaos y diputaes d'España