Tipoloxía de los castros Si miramos la orografía de la zona ú s'asienten, podemos dividir los castros en: Castros d'interior. Son los más abondosos. El pobláu apaez nuna llomba o nun altu, pero de pocu altor. De planta circular o ovalada, tán arrodiaos d'una o más muries y fosos. Castros de monte. S'asitien nuna de les fasteres de montes de más altor,ocupando davezu la parte alta d'un picu. Ellí aprovechen lo arispiu del terrén pa una meyor defensa. Los más d'ellos son de fundación romana, y se rellacionen cola esplotación de mines. Castros costeros. Considérense, na obra de referencia de Jorge Camino, costeros a aquellos que llenden direutamente cola mar, y qu'aprovechen pa la so defensa, amás de les muries y cárcavos avezaos nesti tipu de poblaos, los cantiles de la zona.
Rellación de castros n'Asturies Na catalogación de José Manuel González, a finales de la década de 1960, enumerábense 93 castros. Anguaño'l númberu d'estructures identificaes como posibles castros nes cartes arqueolóxiques de los diferentes conceyos d'Asturies supera los 400. D'ellos Alfonso Fanjul Peraza (Los castros de Asturias. Una revisión territorial y funcional, 2004) identifica positivamente como tales a 246 d'ellos, que son los que recoyemos nel cuadru que vien darréu.