María Adela Maluenda Campos foi una actriz y política chilena. Foi militante del Partíu Comunista de Chile y del Partíu pola Democracia. Ente 1965 y 1969 y ente 1990 y 1994 foi diputada de la República.
Foi una activa defensora de los derechos humanos mientres la dictadura militar chilena, especialmente tres la muerte del so fíu, el sociólogu José Manuel Parada Maluenda nel Casu Degollados.
Biografía Fía de Juan Agustín Maluenda Vidaurre y María Campos Gutiérrez, fizo los sos estudios primariu y secundariu nel Llicéu N° 4 de Recoleta. Estudió na Universidá de Chile, au cursó un añu la carrera de derechu y otru la de pedagoxía en castellán. Darréu dedicóse a l'actuación, que deprendió de forma autodidacta.
En 1941, Maluenda formó parte del grupu que fundó'l Teatru Esperimental de la Universidá de Chile. La primer función del teatru foi La guardia cuidadosa, protagonizada pola actriz. Tres años más tarde, foi protagonista de la película Hollywood ye asina, dirixida por Jorge Délano, una de les primeres cintes sonores filmaes en Chile. Desempeñóse amás nel radioteatru y trabayó na BBC.
En 1946, casóse col actor Roberto Parada, col que tuvo dos fíos, José Manuel y María Soledad. Maluenda xunióse al Partíu Comunista en 1958. Foi diputada mientres el periodu 1965-1969, electa pola Séptima Agrupación Departamental «Santiago», Primer Distritu, representando a aquel partíu. Mientres el gobiernu de Salvador Allende foi embaxadora de Chile en Vietnam ente 1972 y 1973.
El 29 de marzu de 1985, el so fíu José Manuel, quien trabayaba na Vicaría de la Solidaridá, foi secuestráu y asesináu. El so cuerpu apaeció a otru día al pie de los d'otros dos profesionales. El fechu foi conocíu como «Casu Degollados» y, tres les investigaciones feches, súpose que los crimes foran perpetraos por axentes de la Direición de Comunicaciones de Carabineros (DICOMCAR).
Mientres la segunda metá de la década de 1980, Maluenda participó nel Movimientu por Eleiciones Llibres, que buscaba terminar col Réxime Militar al traviés de la inscripción nos rexistros eleutorales y el plebiscitu. L'actriz criticó'l rol de grupos estremistes, como'l Frente Patrióticu Manuel Rodríguez, y deslligóse del Partíu Comunista por diferencies de fondu. En 1987, Maluenda participó na fundación del Partíu pola Democracia.
En 1990, postuló como diputada representando a aquel partíu pol distritu 17, siendo eleuta pal periodu llexislativu 1990-1994. Foi presidenta provisional de la Cámara'l 11 de marzu de 1990 y presidió la sesión d'instalación en virtú de lo dispuesto nel Artículu 1.° Transitoriu, incisu 2ᵁ de la llei Nᵁ 18.918 Orgánica Constitucional del Congresu Nacional. Integró la Comisión Permanente de Rellaciones Esteriores, Asuntos Interparllamentarios ya Integración Llatinoamericana y la de Derechos Humanos, Nacionalidá y Ciudadanía.
Nun foi a la reeleición pal siguiente periodu.
María Maluenda finó en Santiago'l 29 d'agostu de 2011. Los sos restos foron velaos nel salón d'honor de la sede de Santiago de la Cámara de Diputaos y el so funeral realizó'l 30 d'agostu nel campusantu Parque de l'Alcordanza.
Historia eleutoral
Eleiciones parllamentaries de 1989 Eleiciones parllamentaries de 1989 a diputáu pol distritu 17 (Conchalí, Huechuraba y Renca)
CandidatuPactuPartíuVotos%Resultáu Ramón Elizalde Hevia Concertación pola Democracia PDC 61.640 33,07% Diputáu María Maluenda Campos Concertación pola Democracia PPD 54.939 29,47% Diputada Luis Cordero Barrera Democracia y Progresu UDI 37.033 19,87% Carlos Martínez Democracia y Progresu RN 13.802 7,40% Álvaro Gómez Gallo Lliberal-Socialista Chilenu ILE 12.876 6,91% Denise Barroilhet Monardes Alianza de Centru AN 2.427 1,30% Cristóbal Mario Tapia Vega Alianza de Centru ILD 1.832 0,98% Enrique Barra González Independiente (Fora de Pactu) IND 1.869 1,00%
Referencies
Enllaces esternos
Categoría:Embaxadores de Chile Categoría:Diputaos y diputaes de Chile Categoría:Comunistes de Chile Categoría:Militantes del Partíu pola Democracia Categoría:Actores y actrices de teatru de Chile Categoría:Persones de Santiagu Categoría:Políticos y polítiques de Chile