Fernando Martínez García-Ordóñez nació nel pueblu asturianu de Salas el 22 de xunu de 1922 y finó en Valencia el 21 de payares de 2015. Cursó les carreres de Ciencies Exactes y Arquiteutura, llogrando'l títulu nesta postrera pola Escuela d'Arquiteutura de Madrid en xunetu de 1955.
Formación académica y primeros trabayos Siendo entá estudiante conoz a Pedro Bidagor Lasarte con ocasión del "Concursu d'Idees pa la Ordenación del Centru Comercial na Avenida del Xeneralísimu" (más tarde conocíu como complexu AZCA), nel que resulta premiáu con un accésit: en ganándose l'enfotu del entós Xefe de la Seición d'Urbanismu de la Direición Xeneral d'Arquiteutura, consigue dos años más tarde, en 1957, el so encamientu pa treslladase a Valencia, col encargu de realizar un informe urbanísticu pal Ministeriu de la Vivienda. Amás de los sos trabayos de coordinación urbanística pa la Solución Sur tres la riada del 13-14 d'ochobre de 1957, García-Ordóñez eslluma cola so primer obra como arquiteutu: la Escuela-Jardín Guadalaviar (1958-59), delicáu referente de l'arquiteutura moderna valenciana, que sería recoyíu por numberoses publicaciones profesionales tantu nacionales (Informes de la Construcción, nᵘ125) como estranxeres (L'Architecture d'aujourd'hui, nᵘ91; The Architect & Building News, nᵘ30, ente otres).
Estudiu GO-DB Arquiteutu Asociaos En 1960, tres un añu de collaboración, funda xunto a Juan María Dexeus Beatty l'estudiu GO-DB Arquiteutos Asociaos, asina llamáu por responder a les iniciales de los sos primeros socios. Ente otros proyeutos, destaquen el Grupu de viviendes Virxe del Carmen (1958-62) en El Cabañal, Valencia; el xalé realizáu pal ministru Mariano Navarro Rubio (1960) y la ilesia de La nuesa Señora de Loreto, en Xàbia (Alicante), qu'optó al Premiu Nacional d'Arquiteutura de 1969, dambos en Xàbia. Tamién son dignos de destacar otros exemplos como'l Grupu Residencial Cadahía (1963), la coautoría del proyeutu del Parador nacional de Turismu de Salamanca (1972), los sos propios estudios en El Puig (1973) o la ordenación y diseñu del complexu comercial Nuevu Centru (1980-82).
Viaxes internacionales Viaxó per motivos profesionales a numberosos países: Estaos Xuníos, Polonia, XRSS, Kenia, Finlandia (onde visitó l'estudiu d'Alvar Aalto en 1963), etc..., y destacó pola so capacidá d'organización, xenerando en Valencia un nuevu conceutu empresarial pal desenvolvimientu de proyeutos d'arquiteutura. García-Ordóñez tuvo dos grandes pasiones profesionales: l'urbanismu y la construcción prefabricada. Nel primer campu desenvolvió un importante papel sobre manera coles sos contribuciones teóriques. Destaca la so participación nel Primer Congresu Nacional d'Urbanismu, pal que redacta una Sesión d'Estudiu, o'l so Carta a los urbanistes, publicada na revista Binário. Tocantes a la construcción industrializada, la so esperiencia coles viviendes esperimentales prefabricaes realizaes nel polígonu de Campanar (1969) fáen-y merecedor del calificativu de pioneru.
Obra arquitectónica en Valencia El so calter infatigable llevólu a realizar numberoses propuestes pal Conceyu de Valencia (sobre actuaciones nel centru históricu o l'aprovechamientu de les marxinales del vieyu calce), a desenvolver proyeutos de construcción prefabricada y a presentase a diversos concursos internacionales. Foi Doctor Arquiteutu y Académicu de Númberu de la Real Academia de Belles Artes de San Carlos. Como colofón a la so estensa trayeutoria profesional, recibió en 2007 el Mestre Valencià d'Arquiteutura, gallardón honoríficu del Colexu Oficial d'Arquiteutos de la Comunidad Valenciana.
Notes y referencies
Enllaces esternos García Ordóñez y GO.DB., nel diariu Levante La buelga constructiva del arquiteutu asturianu Fernando M. García-Ordóñez, nel diariu La Nueva España Muerre Fernando García-Ordoñez, l'arquiteutu del Plan Sur de Valencia nel diariu Las Provincias
Publicaciones de Fernando M. García-Ordóñez recoyíes en Dialnet
Categoría:Persones de Salas Categoría:Arquiteutos y arquiteutes d'Asturies Categoría:Wikipedia:Mantenimientu:Persones ensin plantía nym