Крэсіва, красала — металічная прылада для высякання агню з крэменю.
Бытавала з эпохі жалезнага веку на працягу многіх стагоддзяў.
Паводле формы вылучаюць наступныя тыпы крэсіваў: абаранкападобнае (з язычком пасярод ударнага ляза і без яго), 2-лязовае авальнае, 2-лязовае прамавугольнае, санкападобнае, у выглядзе прамавугольнай пласцінкі з адагнутымі ўверх канцамі; існавалі і індывідуальныя формы.
Высечаная з крэменю іскра падпальвала цэру (маса накшталт ваты з вываранага і высушанага дрэвавага грыба). Крэмень, крэсіва і цэру насілі звычайна ў магалейцы — скураным мяшэчку каля пояса з левага боку. Са з’яўленнем у ХІХ стагоддзі запалак бытаванне крэсіва заняпала спачатку ў горадзе, потым і ў вёсцы.
Катэгорыя:Крыніцы агню