«Гадзіла мінус адзін» ( або , Gojira Mainasu Wan, ) — японскі эпічны фільм кайдзю 2023 года, рэжысёрам, сцэнарыстам і аўтарам візуальных эфектаў якога з’яўляецца Такасі Ямазакі. Гэта 37-ы фільм у франшызе пра «Гадзілу».
Прэм’ера «Гадзіла мінус адзін» адбылася ў Shinjuku Toho Building 18 кастрычніка 2023 года і фільм выйшаў у Японіі 3 лістапада ў гонар 70-годдзя франшызы. Чорна-белая версія была выпушчана ў Японіі і ЗША ў студзені 2024 года.
Фільм сабраў у сусветным пракаце больш за 107 мільёнаў долараў пры ацэначным бюджэце ў 10–12 мільёнаў долараў, стаўшы пятым па касавых зборах японскім фільмам 2023 года і абагнаўшы Шын Гадзілу як самы паспяховы японскі фільм пра Гадзілу.
Фільм атрымаў прызнанне крытыкаў за візуальныя эфекты, рэжысуру, гісторыю, персанажаў і музычнае суправаджэнне. Ён атрымаў шмат высокіх ацэнак, у тым ліку 12 намінацый на 47-й прэміі Японскай кінаакадэміі (выйграў у васьмі), тры намінацыі на 17-й цырымоніі ўручэння прэміі Asian Film Awards (выйграў у дзвюх) і перамогу ў намінацыі за найлепшыя візуальныя эфекты на 96-й цырымоніі ўручэння прэміі «Оскар».
Сюжэт Канец Другой сусветнай вайны. Японскі пілот камікадзэ Коічы праяўляе баязлівасць і пад ілжывай падставай тэхнічных непаладак самалёта саджае яго на адным з бліжэйшых да Японіі астравоў. Уначы лётчык падвяргаецца нападу велізарнага монстра Гадзілы, садзіцца ў самалёт, а затым губляе прытомнасць. Пасля вяртання дадому ў Токіа Коічы даведваецца аб гібелі сваёй сям’і. Яго мучыць пачуццё віны за тое, што застаўся жывы. Ён займаецца абясшкоджваннем мін, клапоціцца аб самотнай маладой жанчыне Норыка і маленькай дзяўчынцы Акіко, якая страціла бацькоў. Тым часам ЗША праводзіць ядзерныя выпрабаванні, у выніку якіх Гадзіла падвяргаецца мутацыі, вырастае ў памерах, набывае сакрушальную сілу ў выглядзе цеплавога промня.
Пачвара пачынае знішчаць ваенныя караблі і накіроўваецца да Японіі. Монстр нападае на раён Токіа, дзе знаходзіцца Норыка. Супраць Гадзілы выходзяць біцца самыя новыя японскія танкі, але запушчаны гігантам цеплавы прамень стварае ядзерны выбух і масавую гібель людзей. У ліку загінулых лічыцца Норыка, а забіты горам Коічы прагне помсты. Пачынаецца адчайнае супрацьстаянне людзей і агрэсіўнага звера.
Зноскі
Спасылкі
Катэгорыя:Фільмы на японскай мове Катэгорыя:Фільмы Японіі 2023 года