League of Legends (abreviado como LoL) é un videoxogo multixogador desenvolvido e publicado por Riot Games para Microsoft Windows e macOS. O xogo é un modelo freemium que se sostén con micro-transaccións. Inspirado polo modo de xogos como Warcraft III: The Frozen Throne e Defense of the Ancients os fundadores de Riot buscaron desenvolver un xogo independente do mesmo xénero. Dende o seu lanzamento en outubro de 2009, o xogo é de balde e monetízase mediante a personalización de personaxes que se poden comprar. O xogo está dispoñible para Microsoft Windows e macOS.
No xogo, dous equipos de cinco xogadores loitan en combate xogador contra xogador, cada equipo ocupando e defendendo a súa metade do mapa. Cada un dos dez xogadores controla un personaxe, coñecido como "campión", con habilidades únicas e diferentes estilos de xogo. Durante unha partida, os campións vólvense máis poderosos acumulando puntos de experiencia, gañando ouro e comprando artigos para derrotar ao equipo contrario. No modo principal do xogo, Summoner's Rift, un equipo gaña ao atravesar a base inimiga e destruír o seu "Nexus", unha grande estrutura situada dentro.
League of Legends recibiu críticas xeralmente positivas; os críticos destacaron a súa accesibilidade, deseños de personaxes e valor de produción. A longa vida útil do xogo deu lugar a unha revalorización crítica, e as críticas teñen unha tendencia positiva. O comportamento negativo e abusivo dos seus xogadores dentro do xogo, criticado dende o inicio do xogo, persiste malia os intentos de Riot por solucionar o problema. En 2019, o xogo alcanzou habitualmente oito millóns de xogadores simultáneos e a súa popularidade provocou vinculacións como vídeos musicais, cómics, historias curtas e unha serie animada, Arcane. O seu éxito tamén xerou varios videoxogos derivados, incluíndo unha versión para móbiles, un xogo dixital de cartas coleccionables e un xogo de rol por quendas, entre outros. Está en desenvolvemento un xogo de rol en liña multixogador masivo baseado na franquía.
O xogo é a miúdo citado como o deporte dixital máis grande do mundo, cunha escena competitiva internacional composta por 12 ligas. As ligas domésticas culminan co campionato mundial anual de League of Legends. O campionato de 2019 tivo máis de 100 millóns de espectadores únicos, alcanzando un máximo de audiencia simultánea de 44 millóns. Os eventos nacionais e internacionais foron transmitidos en sitios web de transmisión en directo como Twitch, YouTube, Bilibili, así como a canle de deportes de televisión por cable ESPN.
Modo de xogo League of Legends é un xogo en liña de campo de batalla (MOBA polas súas siglas en inglés) no que o xogador controla un personaxe ("campión") cun conxunto de habilidades únicas dende unha perspectiva isométrica. En novembro de 2021, había 157 campións dispoñibles para xogar. Ao longo dunha partida, os campións gañan niveis acumulando puntos de experiencia (XP) ao matar inimigos. Pódense adquirir elementos para aumentar a forza dos campións, e cómpranse con ouro, que os xogadores acumulan de forma pasiva co paso do tempo e gañan activamente ao derrotar aos esbirros do equipo contrario, campións ou estruturas defensivas. No modo de xogo principal, Summoner's Rift, os artigos cómpranse a través dun menú da tenda dispoñible para os xogadores só cando o seu campión está na base do equipo. Cada partida é discreta; os niveis e os elementos non se transfiren dunha partida a outra.
Notas
Véxase tamén
Ligazóns externas Páxina oficial
Categoría:Videoxogos de 2009 Categoría:Videoxogos de OS X Categoría:Videoxogos desenvolvidos nos Estados Unidos de América Categoría:Videoxogos de Windows Categoría:Videoxogos Free-to-play