Džanan Musa, nado o 8 de maio de 1999 en Bihać, é un xogador bosníaco de baloncesto profesional. Seleccionado na primeira rolda do Draft da NBA polos Brooklyn Nets, xoga na posición de ala cunha altura de 2,06 m. Tras finalizar a súa etapa na NBA e xogar no Anadolu Efes da Euroliga e no Río Breogán da Liga ACB, foi fichado polo o Real Madrid. Desde xullo de 2025 é parte do cadro de xogadores do Dubai Basketball.
Traxectoria Nado en Bihać, ao noroeste de Bosnia e Hercegovina, Musa comezou a xogar de pequeno ao fútbol antes de decidir dedicarse ao baloncesto. Durante a súa etapa xuvenil formou parte do KK Bosna, do KK Koš de Saraxevo e finalmente, desde 2014, do KK Cedevita croata. O 15 de outubro de 2015 fixo o seu debut na Euroliga con tan só 16 anos, sendo un dos xogadores máis novos en debutar na historia da competición. Neste primeiro encontro, disputado ante o Olympiacos, disputou preto de cinco minutos nos que anotou catro puntos. Durante a súa etapa no equipo croata gañou tres ligas e tres copas croatas e unha Supercopa da Liga do Adriático. A nivel individual en 2018 foi recoñecido no mellor quinteto da Liga do Adriático, así como xogador máis prometedor tanto desa competición como da EuroCup, na que fixo unha media de 10,5 puntos e 3,2 rebotes por encontro.
Tras finalizar a súa estancia en Croacia, Musa presentouse ao Draft da NBA de 2018, sendo escollido o 21 de xuño de 2018 na primeira rolda (29ª posición) polos Brooklyn Nets. Após dúas temporadas no equipo neoiorquino, onde fixo unha media de 4,3 puntos e 1,9 rebotes por partido, o 13 de xaneiro de 2021 volveu a Europa tras asinar co Anadolu Efes SK turco. Tras finalizar a temporada, o 21 de xullo de 2021 anunciouse a súa fichaxe polo Río Breogán da Liga ACB. No equipo de Lugo realizou unha gran tempada e converteuse no primeiro xogador dun club galego en gañar o MVP da ACB, despois de ser o xogador con máis valoración da liga (23,1 de media) e o máximo anotador da competición, cunha media de 20,1 puntos por encontro.
Equipos KK Cedevita (HT Premijer liga / ABA / Euroliga, 2015–2018) Brooklyn Nets (NBA, 2018–2020) Anadolu Efes (BSL / Euroliga, 2021) Río Breogán (ACB, 2021–2022) Real Madrid (ACB / Euroliga, 2022–2025) Dubai Basketball (ABA / Euroliga, 2025–presente)
Notas
Véxase tamén
Ligazóns externas Perfil en NBA.com Estatísticas en Basketball-Reference.com Perfil en Euroleague.net
Categoría:Nados en 1999 Categoría:Nados no cantón de Una-Sana Categoría:Xogadores de baloncesto de Bosnia e Hercegovina Categoría:Escoltas de baloncesto Categoría:Xogadores de baloncesto da NBA Categoría:Xogadores de baloncesto da ACB Categoría:Eleccións no Draft da NBA dos Brooklyn Nets Categoría:Xogadores do KK Cedevita Categoría:Xogadores dos Brooklyn Nets Categoría:Xogadores do Anadolu Efes SK Categoría:Xogadores do Club Baloncesto Breogán Categoría:Xogadores do Real Madrid Baloncesto