Celestino de Pazos Teijeira, nado en Corcubión e finado en Zamora en 1899, foi un relixioso galego.
Traxectoria Fillo do notario Nicolás de Pazos Fernández e de Juana Teijeira Ardeleiros. Neto por liña materna de Deogracias Manuel Teijeira Pérez (orixinariamente Teixeira Peres) e bisneto de Francisco Antonio Ardeleiros Romero de Leis, os dous escribáns-notarios no arciprestado de Nemancos.
Párroco nos concellos de Mazaricos e Pontedeume, foi director neste último do Colegio Eclesiástico, dependente do Seminario Central do mosteiro de San Martiño Pinario de Santiago de Compostela, nomeado polo cardeal Miguel Payá y Rico. Cóengo da catedral de Xirona, foi deán das catedrais de Vic, Tortosa e Zamora.
Polemizou co sacerdote Félix Sardá y Salvany, sobre o seu opúsculo integrista El liberalismo es pecado (1884), co texto El proceso del integrismo. Refutación de los errores que contiene el opúsculo del Señor Sardá i Salvany "El liberalismo es pecado" (1885). Autor ademais de San Narciso Mártir e Encomio a los mártires de la Independencia de 1808. Nesa polémica interveu, ademais do Vaticano, o cardeal Payá, desautorizando o deán e sinalándoo como "edecán de Antonio Romero Ortiz" durante a Revolución de 1868.
Vida persoal
Foi irmán de Nicolás de Pazos -avogado e dirixente na Coruña do Partido Integrista de Ramón Nocedal-, e do que fora alcalde de Arteixo Faustino de Pazos. Tío-avó segundo de Javier Teijeira Brunet, neurofisiólogo, fundador e profesor da facultade de medicina da Universidade de Navarra.
Categoría:Nados en Corcubión Categoría:Nados en ano descoñecido Categoría:Finados en 1899 Categoría:Personalidades do catolicismo de Galicia Categoría:Personalidades de Galicia sen imaxes