A pentosidina é un biomarcador para os produtos finais da glicación avanzada. É un membro ben caracterizado e doadamente detectable desta ampla clase de compostos.
Introdución Os produtos finais da glicación avanzada son compostos bioquímicos que se forman continuamente no corpo en circunstancias normais, pero fano máis rapidamente en diversas situacións de estrés, especialmente estrés oxidativo e hiperglicemia. Serven como marcadores do estrés e actúan eles mesmos como toxinas. A pentosidina é un exemplo típico desta clase, coa particularidade de que emite fluorescencia, o cal permite que se poida medir doadamente. Como é un composto ben caracterizado, estúdase frecuentemente para obter coñecementos sobre a bioquímica dos produtos finais da glicación avanzada en xeral.
Bioquímica A pentosidina deriva da pentosa ribosa e forma enlaces cruzados fluorescentes entre residuos de arxinina e lisina no coláxeno. Fórmase na reacción dos aminoácidos cos produtos da ribosa da reacción de Maillard.
Aínda que só está presente en concentracións traza entre as proteínas dos tecidos, é útil para estimar os danos acumulativos ás proteínas —formación de produtos finais da glicación avanzada— causados por reaccións de dourado non encimático con carbohidratos no corpo (parecidas ás que ocorren ao cociñar alimentos na caramelización e na reacción de Maillard).
Fisioloxía In vivo os produtos finais da glicación avanzada forman pentosidina por fragmentación do azucre. En pacientes con diabetes mellitus tipo 2, a pentosidina correlaciónase coa presenza e gravidade das complicacións diabéticas.
Notas
Categoría:Biomoléculas Categoría:Guanidinas Categoría:Imidazopiridinas Categoría:Biomarcadores Categoría:Produtos finais da glicación avanzada