Silvino de Almeida Louro, coñecido deportivamente como Silvino, nado en Setúbal o 5 de marzo de 1959 e finado en Madrid o 19 de marzo de 2026, foi un futbolista portugués que xogaba na posición de gardameta.
Silvino tivo unha carreira extensa na Primeira Liga, competición na que sumou 21 tempadas e 408 partidos. Tras a súa retirada como xogador, traballou como adestrador de gardametas en diferentes clubs baixo a dirección de José Mourinho.
Traxectoria
Carreira en clubs Comezou a súa carreira profesional co Vitória de Setúbal en 1977. Cinco anos despois fichou polo Vitória de Guimarães. Na tempada 1984/85 asinou contrato co Benfica como suplente de Manuel Bento, aínda que non chegou a debutar na Primeira Liga nesa campaña.
Na tempada 1985/86 foi cedido ao Clube Desportivo das Aves. Tras regresar ao Benfica, Silvino competiu deportivamente con Neno para ocupar o posto de gardameta titular. Durante as seguinte tempadas contribuíu a conseguir catro títulos de liga para o Benfica. Tamén participou en dúas finais da Liga de Campións da UEFA, nos anos 1988 e 1990, neste último caso como capitán do equipo.
En 1994 fichou novamente polo Vitória de Setúbal. Na tempada 1995/96 pasou a formar parte do FC Porto. A pesar da saída do titular Vítor Baía para o FC Barcelona, Silvino participou en poucos partidos do Porto. Finalizou a súa carreira no Salgueiros, onde se retirou en xuño de 2000 á idade de 41 anos.
Posteriormente Silvino traballou como adestrador de gardametas no Porto, no Chelsea, no Inter de Milán, no Real Madrid e no Manchester United, sempre baixo a dirección de José Mourinho. Silvino participou na formación de xogadores como Vítor Baía, Petr Čech e Júlio César, todos eles gañadores do premio da UEFA ao mellor gardameta.
Traxectoria internacional O debut de Silvino coa selección de fútbol de Portugal tivo lugar o 13 de abril de 1983, cando foi gardameta nun empate 0-0 contra Hungría. Aínda que non foi convocado para a Eurocopa de 1984, Silvino regresou ao conxunto nacional para a fase clasificatoria do Mundial de Fútbol de 1990.
Tras a lesión do titular Vítor Baía, Silvino xogou os últimos dous partidos da fase de clasificación para o Mundial de Fútbol de 1998. O derradeiro encontro internacional de Silvino tivo lugar o 11 de outubro de 1997, cando participou nunha vitoria por 1-0 perante Irlanda do Norte. Á idade de 38 anos, Silvino igualou a marca de Vítor Damas como o futbolista máis vello en xogar co equipo nacional portugués.
Entre os anos 2000 e 2002 foi adestrador de gardametas na selección portuguesa.
Falecemento Silvino faleceu o 19 de marzo de 2026 tras unha doenza prolongada.
Palmarés Benfica Primeira Liga: 1986–87, 1988–89, 1990–91, 1993–94 Taça de Portugal: 1984–85, 1986–87, 1992–93 Supertaça Cândido de Oliveira: 1989 Liga de Campións da UEFA (segundo lugar): 1987–88, 1989–90
Porto Primeira Liga: 1995–96, 1996–97
Supertaça Cândido de Oliveira: 1996
Notas
Véxase tamén Ligazóns externas Silvino Perfil na web oficial da Federación Portuguesa de Fútbol
Categoría:Nados en 1959 Categoría:Nados no distrito de Setúbal Categoría:Futbolistas de Portugal Categoría:Finados en 2026 Categoría:Gardametas de fútbol Categoría:Xogadores da selección de fútbol de Portugal Categoría:Xogadores do Vitoria FC Categoría:Xogadores do Vitória SC Categoría:Xogadores do SL Benfica Categoría:Xogadores do FC Porto Categoría:Xogadores do CD Aves Categoría:Xogadores do SC Salgueiros Categoría:Xogadores da selección de fútbol de Portugal sub-21