Trifolium phleoides — едногодишен вид на детелина опишано од Карл Лудвиг фон Вилденов. Во Каталогот на живот не се наведени подвидови.
Опис Растението е едногодишно, високо 10–40 см. Стеблото е зелено или црвенкаво, најчесто неразгрането, поретко разгрането, со неколку долги исправени стебленца. По површината е покриено со прилегнати влакна, а листовите се ретко распоредени. Базалните листови имаат дршки два до три пати подолги од листната плочка, додека кај стеблените листови дршките се еднакво долги или покуси од листната плочка, а кај најгорните листови се многу куси. Лисните дршки се многу тенки и покриени со прилегнати влакна. Долните листови се обратнојајцевидни, а горните елиптични до долгнавесто-копјести, долги 10–20 мм, со тап или заоблен врв и неколку ситни запци. Од двете страни се покриени со прилегнати влакна. Прилисниците имаат ретки влакна и црвени жили, бели или црвенкави, со зелен врв, долгнавести и со долг, линејно-копјест заострен слободен дел.
Соцветијата се цилиндрични, носени на долги дршки и составени од густо збиени цветови. Цветовите се долги околу 3–4 мм и се без прицветници.
Чашката е ѕвонеста, долга 3–4 мм и покриена со полураширени влакна. Околу отворот се развива јасно изразен калозен прстен. Нејзиниот ѕвонест дел е бел, речиси ципест и долг околу 2 мм. Запците се широко триаголни, заострени и речиси еднакви по должина, или двата странични се малку покуси. Тие се исправени или благо раширени и ѝ даваат на чашката ѕвездест изглед. Венчето е светлорозово, долго околу 2,5–3,5 мм, малку подолго од чашката, а поретко е долго колку неа. Плодот е мешунка која обично содржи едно семе.
Распространетост во Македонија Trifolium phleoides расте по пасишта, камењари, покрај шуми и грмушести состоини во потоплите делови на Македонија. Растението се среќава во: Таорската Клисура, Мавровско Поле, планината Бистра, Мал Крчин во Дебар, планината Баба Сач (Кичевско), Селечка Планина (Прилепско), Црвена Корија во Битола, Преспанско Езеро на островот Голем Град, планината Галичица, и селото Велешта во Струга.
Наводи Zohary,M. & Heller,D., 1984 The Genus Trifolium. Jerusalem. Heywood,V.H. & Ball,P.W., 1968 Leguminosae.In:Flora Europaea Vol.2.ed.Tutin,T.G.et al. Grossheim, A.A., 1952 Flora Kavkaza, Vol.5. Moscow,Leningrad. (Rus) Yakovlev G, Sytin A & Roskov Y, 1996 Legumes of Northern Eurasia. Royal Botanic Gardens, Kew. Bobrov, E.G., 1941 In:Flora URSS, Vol.11. Mosqua, Leningrad. (Rus) Roskov,Yu.R., 1990 Revis.of the g.Trifolium in fl.USSR.Cand.thes.Leningrad(Rus) Bobrov,E.G., 1987 In: Flora Partis Europaeae URSS Vol. 6. Leningrad. (Rus.) Coombe, D.E., 1968 In:Flora Europaea, Vol.2. Cambridge. von Willdenow,C.L., 1802 Sp.Pl.Vol.3
Надворешни врски
Категорија:Флора на Македонија Категорија:Детелина