La French touch es un corrent musical eissit de la scèna electronica parisenca de las annadas 1990. L'apellacion apareis pel primièr còp a París (França) en junh de 1987 quand Jean-Claude Lagrèze, lo fotograf de las nuèchs parisencas, organisa las seradas "French touch" al Palace, fasent descobrir la musica house e los discjoquèis Laurent Garnier, Guillaume la Tortue e David Guetta. French touch es mai un tèrme forratot per designar la musica electronica de França (parisenca mai que mai) que s'expòrta a l'estrangièr puslèu qu'un estili vertadièr, especific e clarament identificable.
La genèsi
Los primièrs noms de la French touch qu'emergisson a la debuta de las annadas 1990 son Dimitri from Paris e Laurent Garnier qu'a de resson en Anglatèrra per sa musica house.
En 1994, DJ Yellow e Bob Sinclar fondan a París lo labèl Yellow Productions. La capitada ven còp-sec : DJ Yellow e Bob Sinclar son convidats a jogar fins al Japon e als Estats Units. D'autres artistas començan alavetz d'aver de resson coma Air, La Funk Mob e DJ Cam.
1995-1998 : L'edat d'aur de la French Touch
Entre 1995 e 1997, la French Touch pren vertadièrament de vam gràcias a las capitadas de dos albums en particular : Boulevard de St Germain (publicat en 1995), dins un estili acid jazz e deep house, e sustot Homework de Daft Punk en 1997, el puslèu dins un estili house pòst-disco, portat pels tubes Da funk e Around the world. L'immensa capitada internacionala de Daft Punk obrís la dralha per la capitada comerciala a d'autres artistas etiquetats "French Touch", Air en particular (album Moon Safari en 1998, portat pel tube Sexy Boy), mas tanben Cassius, Alex Gopher, Demon, Grand Popo Football Club etc. En 1998, lo títol Music Sounds Better with You de Stardust es el tanben un tube enòrme : lo single se vend a mai de dos milions d'exemplaris e es alavetz quasi considerat coma l'imne de la French Touch. Mas la sus-mediatisacion del fenomèn provòca d'agaçament e un retorn de balancièr : a l'excepcion notabla de Daft Punk que la popularitat demorarà permanenta fins a la separacion del grop en 2021, la French touch declina lèu a la tota fin de las annadas 1990.
La segonda èrsa de las annadas 2000-2010
Al mièg de las annadas 2000, la French touch torna al primièr plan al nivèl internacional, portada aqueste còp per la capitada comerciala de discjoquèis e de productors de musica house eissits de las debutas del genre, mas accedissent aqueste còp a la notorietat internacionala, coma per exemple Joachim Garraud, Martin Solveig, Laurent Wolf, Bob Sinclar e sustot David Guetta, e d'autra part pr'amor de l'aveniment d'artistas produsent una musica électonique originala e novatritz coma Yuksek, Vitalic, Justice ambe per exemple lor tube D.A.N.C.E. en 2007, o encara Kavinsky ambe los tubes Nightcall en 2011 e Roadgame en 2013. En 2013, Daft Punk es tanben al som ambe l'album Random Access Memories que conteng los tubes Get Lucky e Instant crush.
Vejatz tanben House Tècno
Categoria:Genre de musica electronica Categoria:House Categoria:Genre musical Categoria:Musica electronica dels ans 1990 Categoria:Musica electronica dels ans 2000 Categoria:Musica electronica dels ans 2010