Кобыле́цка Поля́на, Кобилецька Поляна, Gyertyánliget — мѣстечко в Раховском районѣ Закарпатской области Украины. Статус мѣстечка, «селище мѣстского типа» , достало в року 1971. Облікова картка.
Полога Лежить на рѣчцѣ Шопурка при сутоку рѣчок Мала Шопурка и Середня. Оддалена од найблизшой желѣзничной штации Великый Бычков о 12 км, од Рахова — 50 км, од Ужгорода — 185 км.
История Перва упоминка в жерелах походить з року 1600, под назвов Kabolapoiana, русинского походжѣня. Назва походить од горы Кобыла, котра высить ся над осадов. Мадярска назва Gyertyánliget (грабовый лѣс) появила ся в зачатку 1900-х при мадяризации назв, а была то назва лѣчивых купельох, котры фунговали около села.Sebestyén Zsolt, с. 65.
Од року 1775 в селѣ на основѣ мѣстных найдищ желѣзной руды фунговала желѣзарня, од року 1870 — металоробна фабрика Братмана, де были заняты 100 роботникы, а выробляли аршовы, чеканы, не лем про мѣстну потребу, але и на експорт.Достал Я., с. 144.
В октобру 1914 село на даколько днѣ было заяте русскым войском. В ходѣ боя лѣчивы купелѣ были знищены, зостала з них лем една хыжа.
В апрѣлю 1919 село заяли Румыны, але уже од року 1920 вошло до Чехословакии на основѣ Сен-Жерменского договора.
В року 1930 в селѣ было 2218 обывательох: Русины — 1141, Нѣмцѣ — 548, Евреи — 292, Чехы и Словаци — 115, Румыны — 65, чужинцѣ (без чехословацкого подданства) — 57. Была русинска школа (4 класы) и чешска школа (3 класы), пошта, телеграф, телефон, жандарска станиця.
15. марца 1939 в село вошли Мадяре, 52 обывателѣ, обвинены з участи в украинском руху, были забраны до мадярскых концентрачных лагрох, 6 утѣкли до СССР.Тронько П., сс. 509–513. Там были взяты до совѣтскых працовных лагрох яко «мадярскы шпионы».
17. октобра 1944 в село пришла Червена армада, и зачала ся украинско-совѣтска доба. В августѣ 1945 отворена сѣмрочна украинска школа. Металоробна фабрика реконштруована, од року 1964 достала назву Закарпатска арматурка, Закарпатський арматурний завод, на мѣстѣ бывшых купельох отворили филиалку раховской туристичной базы.
Днешность В Кобылецкой Полянѣ суть 4 лѣсництва, середня школа, дом културы, двѣ библиотекы, болниця, лѣчебно-оздоровный комплекс Трембита, рекреачна база Квасный, жерела минералных вод. В року 1994 в резултатѣ религийного конфликта спалена памятка архитектуры — грекокатолицка деревяна церква Вознесѣня Господнього.
Закарпатска арматурка, де в 1980–1990-х роках мали роботу 1100 особ, а продукция експортовала ся до 30 держав свѣту, в року 2010 ликвидована з причины банкротства.Либавка Б. І.
Администрация Кобилецько-Полянська селищна рада 90620, Закарпатська обл., Рахівський р-н, смт.Кобилецька Поляна, вул.Павлюка, 175
Вызнамны родаци Емилиан Бокшай (1889–1976), священик, русинскый дѣятель Йосиф Бокшай (1891–1975), академичный малярь
Жерела и одказы Sebestyén Zsolt: Máramaros megye helységneveinek etimológiai szótára. Bessenyei könyvkiadó. Nyíregyháza, 2012. Достал, Ярослав. Підкарпатська Русь (Закарпаття періоду Чехословацької республіки: 1919–1938). Ужгород, «Карпати», 2014. Тронько П. и др. (ред.) Історія міст і сіл України. Том 7. Закарпатська область. К. 1969.
Референции
Катеґорія:Населены пункты Украины Катеґорія:Населены пункты Закарпатской области