Федор Потушняк, Федір Михайлович Потушняк, *27. фебруар 1910, Осой, жупа Берег, Мадярске кральовство — †12. фебруар 1960, Ужгород, УССР — украинскый и русинскый поет и писатель, филозоф, етнограф, археолог, педагог.Поп И., сс. 313–314. Биография Школы и зачаток творчостиЗакончив руську (украинску) гимназию в Береговѣ (1922-1930), филозофску факулту Карловой универзиты в Празѣ (1930-1937). Учительовав в Бѣлках, Великом Бычковѣ, служив в чехословацком войску (1937-1938). В тых роках выдав зберкы повѣдань (Земля, 1938), поезии (Далекі вечори, 1934; Таємничі вечори, 1938; Можливості, 1939), в якых видко вплыв французской литературы.Поп І., сс. 610–611.
Войновы рокыПо анексии Подкарпатской Руси Мадярами працовав библиотекарьом в Брнѣ в Протекторатѣ Чехия и Моравия, (1939-1940). Коли мадярска влада дала амнестию подкарпатскым украинофилам, Потушняк ся вернув дому, але зоставав подозрѣваный з нелоялности владѣ и робота в школѣ была про нього заказана. Активно працовав в Подкарпатском Обществѣ Наук (ПОН, 1941–1944). В його выданях под псевдонимом Федор Пасѣчник публиковав свои зберкы поезии (На бѣлых скалахъ, 1941; Хатка та млинокъ, 1944), прозы (Оповѣданя, 1942; Грѣх та иншѣ оповѣданя, 1944), переклады, етнографичны материалы, философскы есеи, историчны начеркы. В маю року 1944 быв мобилизованый до мадярского войска и посланый на восточный фронт, де по пару мѣсяцях трафив до заятя и одбыв даколькы мѣсяцѣ в заятецкых таборах в СССР.
Повоенны рокыДому ся вернув в маю 1945, достав роботу в органѣ КПЗУ Закарпатська правда, а по куртом часѣ яко преподаватель новоствореной Ужгородской державной универзиты (преподаватель, 1946; доцент 1948). Його предметами были славянска филология, археология и етнография.
Потушнякови было тяжко ся приспособити ку порядкам и нормам совѣтского периода. Быв непрестанно критикованый за украинскый буржоазный национализм, антисовѣтскы погляды, антисемитизм, пятолизачство ку западной културѣ. Продовжѣня литературной роботы в привычном духу стало ся неможне, идеологичны нормы тыж не толеровали його етнографичны и филозофскы роботы. Зостала му переважно археология, писав тыж во векшых прозовых жанрах,Тиводар М. П., сс. 262–263. де мусѣв прияти соцреализм. Систематичны преслѣдованя были и причинов його передчасной смерти.
Творба Литературов ся зачав занимати еще в штудентскых роках, добрѣ знав тогочасны европскы литературны тренды, слѣдовав за нима, и його поезия и проза выразно ся выокремльовали в аматерском литературном животѣ Подкарпатской Руси того часу своев фаховостьов, филозофсков глубинов. В поезии ишов за прудом французского символизма. Як етнографа притяговали го народны вѣрованя, карпатска демонология, народны балады трагичного ай историчного характера. Выгледовав етимологию етнонимох, топонимох. Во филозофии выступив первым, кто перештудовав историю филозофской мысли Подкарпатской Руси, и оригиналным филозофом-екзистенциалистом. В журналѣ ПОН Литературна недѣля опубликовав Короткий нарис философіѣ Подкарпатя (1943), де анализуе творбу подкарпатскых мыслительох XVIII. – XX. стороча. Як филозоф-экзистенциалиста в роках 1940 – 1944 выдав ряд робот и штудий в новинках и журналах Русское слово, Недѣля, Народна школа. По войнѣ подобны роботы уже не могли ся публиковати, але Потушняк в роках 1945 – 1960 складовав их в рукопис книгы, котра вышла посмертно под назвов Я і безконечність (2003). Поетичну творчость Потушняка проанализовала во своей монографии Л. Голомб, яка зазначать, же е то поезия елитарна и в ровинѣ обычайной свѣдомости не годна быти освоена, ей вниманя выжадуе од читателя даякый уровень литературного школованя и духовной културы.Голомб Л., с. 96.
Жерела и одказы Голомб, Лідія. Поетична творчість Федора Потушняка / Л. Г. Голомб ; ред. Н. Ребрик. – Ужгород : Ґражда, 2001. – 98 с. Іван Поп: Потушняк Федір // Поп, Иван: Потушняк Федор //Поп, Иван. Энциклопедия Подкарпатской Руси. — Ужгород: Изд-во В.Падяка, 2001. — 431 с. Тиводар М. П.: Потушняк Федір Михайлович //Енциклопедія Закарпаття. Визначні особи ХХ століття. Закарпатський осередок НТШ. Під наук. ред. Довганича О.Д. — Ужгород: «Гражда», 2007 — 400 c.
Референции
Катеґорія:Русиньскы педаґоґы Катеґорія:Русскоязычны поеты Катеґорія:Украинскы писателе