Ле Корбизье, властным йменом Шарл-Едуар Жаннере-Гри, фр. Charles-Edouard Jeanneret-Gris (6. октобра 1887, Ла-Шо-де-Фон, фр. La Chaux-de-Fonds, Швайц – 27. августа 1965, Рокебрин-Кап-Мартен фр. Roquebrune-Cap-Martin, Франция). Походжѣньом франко-швайчарскый архитектор, урбаниста, теоретик архитектуры и малярь. Своим радикалным дѣлом и вытварным чутьом выразно овплывнив вывой модерной архитектуры. Признаваный за найвекшого архитектора 20. стороча.
Биография
Отець му быв ремеселник-годинарь, котрый смалтовав шкатулкы и годинкы, а мати выучовала игрѣ на пианѣ. Старшый брат му став ся аматерскым гудаком. З отцьом и старшым братом часто ходив по верхах околичных гор, и як написав пак у споминках: "мы фурт были на верхах гор; мы выростали, навыкнуты на широкы просторы."Le Corbusier, L'Art décoratif d'aujourdhui (1925), p. 198. Учив ся гравированя и ражѣня в умѣлецкой школѣ в родном мѣстѣ (1900-1904), жебы ити по слѣдах отцьового ремесла. Тото была его цѣла фахова наука. Професор кресбы, Шарл Л'Еплаттенье радив свому ученику ити дале учити ся на архитектора. "Мав ем страх перед архитектуров и архитекторами," споминав тот "...мав ем 16 рокы, выслухав ем вердикт и покорив ся. Пошов ем в архитектуру."Цитоване подля Jean Petit, Le Corbusier lui-meme, Rousseau, Geneva 1970, p. 28. Сам себе называв самоуком, бо вшитко инше научив ся з властной практикы и в своих подорожах по Европѣ. 1905 — яко помочнник фахового архитектора выставив свою перву будову: приватну виллу про гравера Луи Фалле. 1907 — подорож до Будапешту и Вѣдня. 1908-1910 робота и практика в Парижу. 1910-1911 робота и практика в Германии. 1911 — подорож по Сербии, Булгарии, Турции, Греции, Италии. 1914-1917 — во своей старой школѣ в Ла-Шо-де-Фон учить архитектуру и модерне будовництво.Choay, Françoise. Le Corbusier. George Braziller, Inc. 1960. ISBN 0-8076-0104-7. Pp. 10–11. 1917 — дефинитивно оселять ся в Парижу. 1920 — приберать псевдоним Ле Корбизье (од призвиска дѣда по матери). 1921 — отварять властный архитектурный ательер, од року 1924 на ул. Севр, 35 (фр. rue de Sevre, 35), де робить до конця живота проекты про цѣлый свѣт. 1930 — женить ся з Французков и доставать французске гражданство. 1957 — смерть жены. 1960 — смерть матери. 1965 — умерать на инфаркт при купаню в морю.
Творба Творба ле Корбизье обсягуе, окрем главного конаря — архитектурных проектох, малярство, скулптуру и книгы на тематику вытварництва, переважно о архитектурѣ. Первый честный диплом достав уже в року 1902 на межинародной выставцѣ умѣлецкых ремесел в Туринѣ, коли еще лем учив ся в умѣлецкой школѣ. На первой етапѣ занимав ся архитектурныма проектами приватных вилл, а по переселѣню до Парижа активно и малярством. Року 1918 выдавать в соавторствѣ свою перву книгу Après le cubisme (По кубизмѣ). В 1920-х роках сформуловав свои славны "5 выходиск новой архитектуры", а в року 1925 на межинародной выставцѣ в Парижу подля его проекту быв выставленый французскый павилон Esprit Nouveau (Новый дух). В другой половцѣ 1920-х ставать ся членом редакторской колегии часописа Современная архитектура, выдаваного в СССР. Ставать ся познатым и в заграничу и доставать там заказкы на солидны проекты. В року 1928 зо своим проект выгравать конкурз и будуе помпезный будинок Центросоюза в Москвѣ. В 1930-х роках походив Сѣверну и Южну Америкы з лекциями по универзитах и з участьов во многых архитектурных и урбанистичных проектах. В 1950-х роках реализовав много грандиозных проектох в Индии, быв конзултантом при проектованю Главного стана ОЗН в Ню Йорку.
Оцѣнѣня 1937 — рыцарь Честной легии. 1945 — достойник Честной легии. 1964 — великый годностарь Честной легии. 2016 — до списку объектох Свѣтового наслѣдства UNESCO внесены 17 ставб, котры были ним спроектованы в току 50 рокох творчости а котры ся находять на територии семох держав.Umění napříč kontinenty. Mezi památkami UNESCO přibylo 17 staveb od Le Corbusiera чеш.
Жерела и одказы FONDATION LE CORBUSIER англ. Троянский конь большевизма. Со дня рождения архитектора Ле Корбюзье исполнилось 130 лет русс.
Референции
Катеґорія:Архитекторы Катеґорія:Вытварници Катеґорія:Персоналии 20. стороча