Худоба ци бі́дность є стан удсутности фінанчных ресурсув на задоволеня мінімалных потреб челядника, наприклад: їдіня, бываня, цуря. Конкретні дефініції худобы ся рузнят межи світовыми орґанізаціями, державами тай културами. Сохтує ся розділяти абсолутну худобу (котра ся дефінує май універзалнов границьов, єднаков про разні часы и державы) тай удносну (котра залежит на соціалный контекст, условія жывота в удділно взятуй крайині ци сообществі, доходы и другі факторы).
Дефініції Орґанізація споєных націй: Фундаментално худоба тото удказ у выборах и можностьох, нарушеня людської достойности. Ото невозмога ефективно участвовати у жывоті общества. Недостаток ресурсув, обы прогодовати тай удіти родину; ошколы ци клінікы, у котрі мож пуйти; землі, на котруй мож уростити си їдіня тай заробити на жывот; доступа до фінанчных услуг. Ото страх, безсиля, неприятя люди, файт и сообществ. Ото вразливость ид насилствови, часто єствованя у марґіналізованых ци вразливых середовищах, без доступа д чистуй воді ци медицині.
Світовый банк: Худоба ся декларує як недоступность добробыта тай має повно вымірув. Она включат низкі доходы тай невозмогу дустати базові товары тай услугы, мусайні про выжываня из достойностьов. Худоба включат ай низку кваліту жывота и школованя, тяжкый доступ ид чистуй воді тай медицині, недостаточну фізичну безпеку, невозмогу быти вчутым тай недостаток ресурсув и можности уліпшити свуй жывот.
Европська унія (ЕУ): Дефініція худобы у Европськуй унії читаво ся удличат уд дефініцій у другых реґіонах світу, зато ай леґіслативні міры, націлені на борьбу из худобов у державах ЕУ тоже ся удличавут уд еквівалентув у другых крайинах. Худоба ся рахує удносно розподіленя доходув у кажджуй крайині-членови унії из помучов удносных границь бідности. Статистика за худобу ся збират Евростатом, котрый хоснує обзвідованя за доходы тай условія жывота, .
Худоба у реґіонах розселеня русинув У складі Чехословакії, особенно при Першуй республіці, Пудкарпатська Русь была майбідным реґіоном.Unger 1982, б. 80.
Ромы (циґане) У Пудкарпатьови, на Словаках, на Чехах, на Мадярах, у Румынії тай Сербії часто ся асоціювут из худобов тай безроботицьов ромале (циґане) — марґіналізована ґрупа, котра ся пуддават дискримінації, ворожому удношіньови, утискам. Худоба є єднов из причин дискримінації ромського населеня. Европська унія чинит крокы д реалізації плана из інтеґрації ромув тай борьбы з дискримінаційов ромського обывательства.
Маніфестаціями худобы тай дискримінації против ромув сут спеціалні ромські ошколы у крайинах Восточної Европы, котрі як правило мавут гуршу кваліту школованя — у дефініціях худобы якраз часто ся споминат доступ ид адекватному школованю, удсутность котрого ся держит невозмогов задоволнити базову потребу.
В Украйині ромські файты знавут жыти на державну фінанчну помуч, котра ся уплачує за рожденя діти. Худоба місных циґанськых сообществ у поєдных трафунках приводит до того, ож рожденя діти стає бізнісом; сесе контроверзна тема, котра тоже уливат ся у антиромськый сентимент.
Повномасштабна інвазія 24. фебруара 2022. року тай удповідно ескалація Російсько-украйинської войны привели до погуршеня фінанчного стана населеня Украйины, його уднушнього переміщеня тай утіканя за границю. Подля слув представителя громадської орґанізації „Правозахисний ромський центр“ Володимира Кондура, утіканцями за границю стали ай 100,000 ромув из разных реґіонув Украйины,При приблизному числови в 400,000 чоловік ромського населеня в Украйині перед повтомасштабнов інвазійов. Кромі того, приблизно 100,000 ромув стали уднушньо переміщеными особами. часть котрых стала жертвами антиромського сентимента у другых европськых державах тай были розміщені у непридатных про бываня условіях авадь лишені без выплат попри продовженя выплат украйинськым біженцям другых етнічности.
Жерела
Референції
Катеґорія:Економія Катеґорія:Социология Катеґорія:Социалны проблемы