Georgi Konstantinovich Zhukov (Гео́ргий Константи́нович Жу́ков en ruso y alfabeto cerilico), naixito de Strelkovka, hue dita Zhukov en a suya honor (Kaluga, Imperio Ruso, hue Rusia) l'1 d'aviento de 1896 y muerto en Moscú (Unión Sovietica, hue Rusia) o 18 de chunio de 1974, estió un militar y politico ruso d'ideolochía comunista.
En a suya faceta de militar, partecipó con l'Exercito ruso de l'Imperio Ruso en a Primera Guerra Mundial, t'adhibir-se dimpués a l'Exercito Royo sovietico partecipando en a Guerra Civil Rusa. Continó dimpués a suya carrera militar, partecipando en as luitas con l'Imperio chaponés en as mugas de Siberia y Mongolia con Manchukúo (Guerra de mugas sovietico-chaponesa), destacando-ie a suya victoria sobre l'Exercito chaponés en a Batalla de Khalkhin Gol, a on se fació conoixito en estar una important redota chaponesa que remató con as luitas continas en a muga. Mientres a Segunda Guerra Mundial, partecipó en primeras en a Guerra d'Hibierno con Filandia y dimpués, dende a invasión de Rusia por o Tercer Reich en a Operación Barbarroya, estió o chefe d'a esfensa d'a ciudat de Leningrado mientres o Seche de Leningrado, ganando-ie una reputación que fació que manase dimpués, en aviento de 1941, as tropas sovieticas mientres a batalla de Moscú. Por as suyas victorias, mandó as tropas rusas en a batalla de Stalingrado en zaguerías de 1942, a on desembolicó una importantisma victoria que fació reblar a la Wehrmacht. Dica rematar a guerra, mandó tropas de l'Exercito Royo en destacatas accions militars, como a batalla de Kursk, a Operación Bagration u a batalla de Berlín, a zaguera batalla en o Frent Oriental.
Antiparte, en a suya faceta de politico, estió ministro d'Esfensa d'a Unión Sovietica en 1955-1957 mientres o Gubierno de Nikolai Bulganin. Entre muitas atras honors militars, fue nombrato Heroe d'a Unión Sovietica.
Bibliografía Axell, A. Marshal Zhukov: The Man Who Beat Hitler. Londres: Pearson Longman, 2003. ISBN 978-0582772335. Roberts, Geoffrey. Stalin's General: The Life of Georgy Zhukov. Nueva York: Random House, 2012. ISBN 978-0679645177. Spahr, W. J.. Zhukov: The Rise and Fall of a Great Captain. Novato: Presidio Press, 1993. ISBN 978-0891414698.
Obra escrita Marshal Zhukov's Greatest Battles, Cooper Square Press 2002. ISBN 978-1461732006
Vinclos externos
Categoría:Mariscals d'a Unión Sovietica Categoría:Militars de Rusia d'a Primera Guerra Mundial Categoría:Militars d'a Guerra Civil Rusa Categoría:Militars d'a Unión Sovietica d'a Segunda Guerra Mundial Categoría:Ministros d'a Unión Sovietica Categoría:1896 (naixencias) Categoría:1974 (muertes)