Antonio Ernesto Arrufat Gascón (La Cerollera, 1954) ye un politico aragonés, militant d'o Partido Socialista Obrero Español (PSOE) en a provincia de Teruel, a on ha estau alcalde, president d'a deputación provincial y senador.
Biografía Natural de la Cerollera, en a zona catalanoparlant d'a provincia de Teruel, ye albeitar y ha ocupau cuantos puestos agropecuarios en a provincia. Entre ellos destacó por a suya participación en asociacions ganaderas ovinas y caprinas, en as denominacions d'orichen de pernil de Teruel y ternasco d'Aragón y en a politica agropecuaria teruelana.
De 2003 a 2015 estió alcalde d'a suya localidat natal por o PSOE, cargo que compachinó con atros puestos provincials. En 2007 fue elechiu president d'a Deputación Provincial de Teruel, cargo que desempenyó dica 2011. Ixe anyo fue elechiu senador por a provincia de Teruel. En 2015 dimitió d'o suyo escanyo, cuan mancaban dos meses pa rematar a suya lechislatura, pa pasar a estar delegau territorial d'o gubierno d'Aragón en a provincia de Teruel.
En 2015 dimitió d'os suyos cargos adintro d'o «Escandalo d'o pernil», en o que cuantos exdirectivos d'a denominación d'orichen pernil de Teruel fuoron acusaus d'irregularidaz en a chestión. A causa fue archivada por o chuez, reincorporando-lo dimpués a o suyo cargo o gubierno autonomico de Javier Lambán, tornando a estar delegau territorial en a provincia de Teruel, En 2019 fue nombrau asesor d'a presidencia d'o gubierno d'Aragón pa la despoblación.
Referencias
Categoría:Albeitars d'Aragón Categoría:Alcaldes de la Cerollera Categoría:Alcaldes d'o Partido de los Socialistas de Aragón Categoría:Naixius de la Cerollera Categoría:Politicos d'Aragón Categoría:Politicos d'o Partido de los Socialistas de Aragón Categoría:Presidents d'a Deputación Provincial de Teruel Categoría:Senadors por a provincia de Teruel Categoría:Senadors d'a X Lechislatura d'Espanya Categoría:1954 (naixencias)