Un French 75 (en aragonés Francés 75) ye un cóctel alcolico d'orichen francés l'ingredient prencipal d'o cual ye lo champán y que recibe lo suyo nombre como homenache a lo canyón de 75 mm modelo 1897 emplegau por l'exercito francés mientres a Primera Guerra Mundial. A primera versión d'o cóctel estió obra d'o conoixiu barman Harry MacElhone en o New York Bar de París (hue clamau Harry's New York Bar) en decindo que lo cñoctel yera tan potent que en beber-lo se teneba la sensación d'estar bombardiau por o canyón que li da lo suyo nombre. Tanimientres, ye tamien verdat que existen versions bien similars de cóctels ya documentaus mientres o sieglo XIX basaus en champán a lo cual de vegadas se li adhibía chinebra.
Ixe coctel amaneixió como clamau simplament "75" en a obra de Harry MacElhone Harry's ABC of Mixing Cocktails, edicion de 1922, encara que ixa versión publicada yera con calvados, chinebra, granadina y absenta; y ixe mesmo anyo Robert Vermeire publicó la suya composición en Cocktails: How to Mix Them como obra de MacElhone, encara que adhibiba como component o suco de limón a la versión anterior.
O suyo nombre definitivo de "French 75" con a suya composición clasica amaneixió por primera vegada en Here's How, publicau por Judge Jr. en 1927, y que incluyiba como ingredients chinebra, zucre, suco de limón y champán, encara que en bellas obras posteriors se substitui la chinebra por brandy.
Ye un cóctel bien popular, dica lo punto que se menciona en bellas cintas como A Man Betrayed (1941, John H. Auer), Casablanca (1942, Michael Curtiz), u Jet Pilot (1957, Josef von Sternberg), amás de bella atra aparición en bella serie de televisión.
Vinclos externos