O lión de l'Atlas () ye una subspecie de lión orichinaria d'o norte d'Africa, actualment extinta en libertat. Se desconoixe o numero exacto de lions de l'Atlas que se troban en cautividat, incognita que aumenta cuando se para cuenta que muitos d'os eixemplars mantenius en zoolochicos y circos no son individuos puros, sino cruces con atras subspecies de lions dende fa cuantas cheneracions.

Descripción O lión de l'Atlas ye una subspecie de lión mas gran que os suyos parients subsaharianos y indios. O peso calculau pa os masclos ye d'entre 180 dica 270 kg y o d'as fembras d'entre 100 y 180 kg. Os masclos miden bels 3,2 metros y as fembra bels 2,7 metros. Encara que muitos expertos creyen que istas midas y pesos son desacheraus y que a suya mida yera pareixida a la d'os lions subsaharianos.

Os masclos de lión de l'Atlas tienen una clinera que se prolarga dica o peito igual que os suyos parients mas amanaus, os masclos de lión asiatico. Encara que ista caracteristica no sirve pa identificar-los, ya que os lions de cualsiquier subspecie en zonas mas fredas pueden desarrollar istas caracteristicas. Os lions de l'Atlas tienen una cabellera de color negra.

Os lions de l'Atlas y os lions asiaticos tienen rasgos cranials que no tienen a resta de lions, una atra evidencia que proba que son estreitament emparentaus.

O lión de l'Atlas, cuan existiba en libertat, yera un animal menos sociable que atras subspecies de lions, probablement por a suya mida mas gran y un habitat diferent. En o suyo habitat natural s'alimentaba de chabalins, burros, ciervos, arruís y bubalos entre atros.

Habitat y extinción O lión de l'Atlas teneba d'antis mas a suya aria de distribución dende Marruecos dica Echipto. O primer puesto a on s'extinguió por causas humanas estió o delta d'o Nilo antis d'o III milenio aC a causa d'o feito de que os antigos egipcios talaban as selvas, feban campos de cautivo y construyiban ciudaz destruyindo l'habitat d'o lión.

Os espectaclos con lions d'os romanos afectoron a las poblacions de lions, pero menos que cuan apareixioron as armas de fuego en o norte d'Africa. Arredol de l'anyo 1700 os lions s'extinguioron en Libia. En l'anyo 1891 s'extinguioron en Tunisia y en 1893 en Alcheria. O zaguer lión de l'Atlas que vivió en libertat fue cazau en l'anyo 1922.

Prochecto de reintroducción Actualment, cuantos zoolochicos y circos d'o mundo afirman tener lions de l'Atlas mas u menos puros. S'han feito internacionalment cuantos estudios pa mirar de determinar os chens que les son propios y asinas poder seleccionar aquellos individuos que tiengan a mayor pureza. Manimenos, a empresa WildLink International, que empentaba o prochecto, s'ha retirau, quedando iste en suspenso mientres bels cientificos buscan financiamiento alternativo pa rematar-lo.

Referencias

Leo Categoría:Fauna d'Africa