Rafael Sarandeses Álvarez (Uviéu, 1858-1955) Ciruxanu astur.
Biografìa Nació nel senu d’una familia venceyada a la medicina, yá que’l so padre, Rafael Sarandeses y Pérez, tamién yera médicu. Estudió Medicina en Madrid, na Facultá de Medicina de la Universidá Central, y dempués volvió a Asturies, onde desenvolvió una importante trayectoria profesional. Exerció como médicu en Lugones y, posteriormente, trabayó nel Hospital de la Beneficencia Provincial y nel Hospital Provincial d’Uviéu, onde tuvo al so cargu la sala de San Roque como ciruxanu. Tamién prestó servicios médicos n’empreses como Industrial Asturiana Santa Bárbara y la Sociedá Española d’Esplosivos, amás de trabayar nel Hospiciu d’Uviéu. Una de les sos principales aportaciones foi la so preocupación pola salú infantil. Sarandeses concibió la idea de crear un centru marítimu destináu a neños que sufríen escrófula y raquitismu. Esta iniciativa acabó cristalizando na fundación del Sanatoriu Marítimu de Candás, institución de gran importancia na historia sanitaria asturiana.
La so dedicación médica tamién quedó patente durante la epidemia de cólera que sufrió’l norte d’España. Participó na atención a los enfermos en Santander y Vizcaya y destacó pola so actuación profesional. Cola so experiencia y prestixu, llegó a presidir el Colexu de Médicos d’Asturies y foi tamién decanu de la Beneficencia Provincial.
Amás de médicu, tuvo una notable vocación intelectual y lliteraria. Foi unu de los integrantes de la primer redacción del periódicu El Carbayón, publicación fundada n’Uviéu en 1879 y que tuvo una gran importancia na vida cultural y periodística asturiana.
El so interés pola cultura nun se limitó al periodismu. Dejó escritos sobre arte, arqueoloxía y distintos aspectos de la historia y la realidá d’Asturies. Tamién collaboró con otros investigadores y médicos asturianos, como Arturo Álvarez-Buylla, na reedición y anotación de les Memorias de Historia Natural y Médica de Asturias del médicu Gaspar Casal.
La so relación col estudiu de la historia d’Asturies queda tamién reflexada na so participación na obra Asturias, de Octavio Bellmunt y Fermín Canella, onde foi l’autor de la monografía dedicada al conceyu de Ribadedeva. Tien cais dedicaes col so nome n’Uviéu y Lugones.
Referencies ESCRITORES Y ARTISTAS ASTURIANOS Médicos Históricos Españoles
Categoría:Ovetenses