Amanita spissa, tamién conocida como amanita de pies gruesu, ye un fungu basidiomicetu del orde Agaricales. qu'habita en montes de coníferes y menos frecuentemente en montes de frondosas. El cuerpu granible apruz pel branu y seronda. Ye un fungu venenosu en crudu, ente que bien cocíu ye comestible. Sicasí, ye fácilmente confundible cola especie Amanita pantherina, que ye bien tóxica, polo que xeneralmente les guíes micológicas encamienten nun recoyer. L'epítetu específicu spissa significa "gordosa, gruesa".
Descripción Tien un sombreru d'hasta 15 centímetros de diámetru, con cutícula gris parduza cubierta de plaques blanques o gris claro bien xuntaes de testura arenosa. Les llámines son blanques y apertaes, llibres y de cantu arrondáu. El pie ye gruesu y puede midir hasta 10 o 12 centímetros de llargu, de color blancu cebrado en pardu. La base ye axonomorfa y bien gruesa, napiforme —asemeyada a la d'un nabu—, ensin restos de la volva y de color abuxáu. Tien un aniellu persistente, ampliu y estriáu, de color blancu, asitiáu na parte cimera del estipe. La so carne ye blanca y, dacuando, parduza. La esporada ye blanca.
Posibilidaes de tracamundiu Ye posible confundir la cogorda d'esti fungu con exemplares nuevos de Amanita rubescens, pero la carne d'esta postrera tien tonos rosados. Tamién ye posible'l so tracamundiu cola especie venenosa Amanita pantherina, que s'estrema de A. spissa en que la primera tien restos de la volva blanca na so base, distribuyíos de forma homoxénea y l'estipe presenta un bulbu con un característicu cantu anular.
Referencies
Enllaces esternos
spissa
Categoría:TBSpecies