Volvariella bombycina, tamién conocíu como volvaria sedosa, ye un fungu basidiomicetu de la familia Pluteaceae. Ye una especie saprófita, non bien frecuente, que crez sobre materies en descomposición, raigaños y tueros de distintes especies d'árboles caducifolios. Suel crecer sobre rama muertes de pumares, a un par de metros d'altor. La cogorda, o cuerpu granible, apruz dende finales de primavera hasta mediaos de seronda. El basónimu d'esta especie ye Agaricus bombycinus Schaeff. 1774, y el so epítetu específicu, bombycina, deriva de bombyx, "viérbene de seda", y fai referencia al aspeutu sedosu del sombrerucu. Ye comestible, anque abondo escasa y de sabor non demasiao prestosa.
Descripción La cogorda, o cuerpu granible, d'esti fungu presenta un sombreru ente 8 y 20 centímetros de diámetru, y ye de color blancu —de color mariellu claru na var. flaviceps—, cubiertu de fibres sedoses, que-y confieren un aspeutu llanudu bien característicu. N'exemplares nuevos, el sombreru tien forma ovoide o acampanada. Más tarde el sombreru estiéndese, alquiriendo una forma convexa. Les llámines son llibres, bien tupies, anches y ventrudes, de color blancu de primeres, y tomen un color arrosáu más tarde y color carne a la vieyera. El pie ye llisu y de color claru, mide ente 8 y 15 centímetros de llargor y ente 1 y 1,5 de diámetru, daqué más fino cerca del sombrerucu. Nun tien aniellu y presenta una gran volva. La esporada ye rosada y la so carne ye blanca, blanda y de sabor paecíu al del rábanu.
Variedaes Estremense les siguientes variedaes de Volvariella bombycina: V. bombycina var. bombycina (Schaeff.) Singer 1951 V. bombycina var. ciliatomarginata Desjardin & Hemmes 2001 V. bombycina var. flaviceps (Murrill) Shaffer 1957 V. bombycina var. microspora Dennis 1961 V. bombycina var. palmicola (Beeli) Shaffer 1963
Referencies
Enllaces esternos
Categoría:Pluteaceae Categoría:Fungos comestibles
Categoría:TBSpecies